Қишлоқ ўқитувчиси Буюк Дашт тарихини сақлаб қолишга ҳисса қўшяпти. Ғарбий Қозоғистон вилоятида яшовчи Жанибек Абильпеисов ўзига хос харита яратди. Унда маҳаллий ботирлар ва оқинлар туғилган ҳамда дафн қилинган жойлар аниқ кўрсатилган. Шунингдек, у паҳлавонлар ишлатган бешта қурол - камон, қилич, найза, ойболта ва гурзини тўплади. Махамбет Утемисов номли мактаб қошидаги ўлкашунослик музейида сақланаётган экспонатларнинг кўп қисмини педагог ўз ҳисобидан харид қилган.
Жанибек Абильпейисов, ўқитувчи, «Жеруйиқ» ўлкашунослик музейи мудири:
- Музейимиздаги энг қадимий экспонат - эрамизнинг 621 йилига оид Тан сулоласи императори зарб этган танга ҳисобланади. Бу қадимий артефакт мамлакатимиз ҳудуди орқали Буюк Ипак йўли бўйлаб ҳаракатланган савдо карвонлари ва тожирлар ўтганини кўрсатади.
Жанибек Абильпеисовнинг асосий мақсади – улғайиб келаётган авлодга ўз ватани тарихига муҳаббат ва ҳурмат ҳиссини улашиш. Педагог ўқувчилари билан тадқиқот ишлари олиб боради. Ўлканинг ўзига хосликларини ўрганади.
Бекет Ажигалиев, ўқувчи:
- Биз 2022 йилдан бошлаб ҳар йили экспедицияларга чиқамиз. Шу жумладан, Жапаркелди ботир қабрини тадқиқ қилдик. У ерда жуда кўп қизиқарли артефактлар топа олдик. Қўшни вилоятга ҳам бордик.
Абдумалик Сарманов таржимаси
Ўхшаш янгиликлар
