Қозоғистон Евроосиёнинг етакчи савдо ва логистика хабига айланишга интилмоқда. Мамлакат бизнес учун бир ярим миллиард кишилик ЕОИИ, Марказий Осиё ва Хитой бозорига чиқиш имкониятини яратади. Бугун Президент Қосим-Жўмарт Тўқаев Қозоғистон — Словения бизнес-форумида хорижий инвесторларга тақдим этиладиган имкониятлар ҳақида батафсил гапирди. Ҳозир Қозоғистон иқтисоди фаол ривожланаётган минтақанинг энг йирик ўйинчиларидан бири. Логистика маркази сифатида катта имкониятларга эга. Қозоғистон орқали ташилаётган юк ҳажми ўтган йили рекорд даражага етди ва 514 миллиард тонна-километрни ташкил қилди. Бугунги кунда Европа ва Хитой ўртасида қуруқлик орқали ташиладиган юкларнинг 90 фоизи республика ҳудудидан ўтади.
Қосим-Жўмарт
Тўқаев, Қозоғистон Республикаси Президенти:
– Биз Ўрта йўлак ва «Шимол — Жануб» йўлаги каби йирик халқаро транзит артерияларини фаол ривожлантиряпмиз. Ақтау ва Қуриқ портлари Каспий денгизи орқали транзитда муҳим ўрин тутади. Ўтган йили улар орқали мисли кўрилмаган даражада кўп — 4,5 миллион тонна юк ташилди. Транспорт алоқаларини мустаҳкамлаш ва савдони кенгайтириш учун биз Словениянинг энг йирик бандаргоҳи — Копер порти билан ҳамкорлик қиляпмиз.
Давлат раҳбари истиқболли йўналишлардан саноат ва энергетика соҳаларидаги ҳамкорликни кўрсатиб ўтди. Бунда катта имкониятлар бор, зеро, Қозоғистон нефтининг 70 фоизи Европага экспорт қилинади. Мамлакатда 19 та ноёб-ер элементлари қазиб олинади. Бу эса «яшил» энергетикани ривожлантиришга йўл очади. Шунингдек, Қосим-Жўмарт Тўқаев словениялик ҳамкорларни агросаноат, фармацевтика, Ай-Ти секторида инвестициявий лойихаларни рўёбга чиқаришга чақирди.
Абдумалик Сарманов таржимаси
Ўхшаш янгиликлар
