Президент Қосим-Жўмарт Тўқаев шаҳмат бўйича Қозоғистон аёллар терма жамоасини 2024 йилги Бутунжаҳон шаҳмат олимпиадасида кумуш медаль олгани билан қутлади. Давлат раҳбари ижтимоий тармоқдаги саҳифасида: «Бу қозоқ шаҳмат мактаби ва унинг ажойиб вакилалари эришган улкан ютуқ. Барча спортчиларимизга янги муваффақиятлар тилайман!» деб ёзди. Қозоғистон Шаҳмат федерациясида маълум қилинишича, Венгрияда бўлиб ўтган 45-Шаҳмат олимпиадасида вакилаларимиз ўта кучли саналган АҚШ ва Польша жамоасини мағлуб қилди, Ҳиндистондан атиги бир очко фарқ билан енгилди. Таъкидлаш лозимки, олинган кумуш медаль мамлакат спорт тарихида жуда юқори кўрсаткич бўлди. Терма жамоа 2022 йилда Ҳиндистоннинг Ченнаи шаҳрида ўтказилган беллашувларда 5-ўрин билан кифояланганди. 11 турда ғалаба қозонган ва 169 давлат вакилларини ортда қолдирган жамоа ўйинларида Бибисара Асаубаева, Меруерт Камалиденова, Ксения Балабаева, Амина Қайрбекова ва Алуа Нурман иштирок этди.
Тимур Турлов, Қозоғистон Шаҳмат федерацияси президенти:
– Назаримда, бизда мавжуд бўлган ҳайратомуз даражадаги улкан интеллектуал салоҳият эндигина очилиб келяпти. Биз иккинчи ўринни олибгина қолмадик. Бутун Олимпиада давомида энг илғор жамоалар билан ёнма-ён бўлдик. Ҳамиша биринчи ва иккинчи ўрин оралиғида ҳаракат қилдик. Бизда олимпиадада қатнашган энг навқирон жамоалардан бири ўз маҳоратини намойиш этди. Жамоанинг ўртача ёши 19 да. Уларнинг кўпчилиги ҳаётида биринчи марта олимпиадада қатнашди. Олдинда ҳали олимпиадалар жуда кўп. Барчаси тажриба тўплашга улгуради. Яқин келажакда олимпиадаларда олтин медаль олишимизга ишончим комил. Кўрсаткичларимиз улкан интеллектуал келажакка эга давлатлар қаторига кирганимизни намойиш этади.
Абдумалик Сарманов таржимаси.
Ўхшаш янгиликлар
