Қозоғистонда жаҳон даражасидаги Almaty Superski тоғ-чанғи
курорти қурилиши бошланди. Бош вазир Ўлжас Бектенов раислигида ўтказилган йиғилишда мегаполис тоғ кластерини
ривожлантириш билан боғлиқ масалалар кўриб чиқилди, лойиҳанинг асосий
объектларини лойиҳалаш ва қуриш бўйича қарорлар қабул қилинди. Очиқ танлов
доирасида қуриш ишларини амалга ошириш Франция, Канада ва АҚШнинг етакчи халқаро компаниялари зиммасига
юкланди. Шу жумладан, Франциянинг POMA (ПОМА) компанияси гондола ва кресло кўтаргичли 11 та
замонавий арқон йўли қуради. У бундай
лойиҳаларда катта тажрибага эга. 90 мамлакатда 8 мингтадан зиёд объект бунёд этган. Лойиҳалаштиришдан
қурилишгача бўлган барча босқичларни мувофиқлаштириш билан Америка компанияси
шуғулланади.
Ержан Еркинбаев, Kazakh Tourism Development компанияси
бош ижрочи директори:
- Almaty Superski курортини қуришда экологияни эҳтиётловчи ечимлардан фойдаланилади. Norman Foster архитектура бюроси томонидан лойиҳалаштирилган иншоотлар бино ва арқон йўллари станцияларини қуришда асосан ёғоч конструкциялардан фойдаланишни кўзда тутади. Бундай ёндашув тупроқ ишларини чеклаш, атроф-муҳитга таъсирни камайтириш имконини беради. Конструкцияларни эса Канаданинг дунёга машҳур StructureCraft компанияси ишлаб чиқаради.
Ўлжас Бектенов лойиҳани рўёбга чиқаришда муддатлар ва сифат, халқаро хавфсизлик ва экологик масъулият стандартларига риоя этилишини қатъий назорат қилишни топширди. Ҳукумат "Almaty Superski" лойиҳасининг амалга оширилиши туризм соҳасини ривожлантиришга туртки беради ва хизмат кўрсатиш соҳасига мультипликатив таъсир кўрсатади, деб ҳисоблайди. Тоғ-чанғи курорти 2028 йил декабрь ойида ишга тушиши режалаштирилган.
Абдумалик Сарманов таржимаси.
Ўхшаш янгиликлар
