Қозоғистон ва Шимолий
Македония савдо-иқтисодий алоқаларни кенгайтиради. Скопье шаҳрида Савдо ва интеграция
вазири Арман Шаққалиев ҳамда ушбу давлат президенти Гордана Силяновска-Давкова мана
шу масалани муҳокама қилди. Шимолий Македония Ташқи ишлар вазири Тимчо Муцунски
билан учрашувда эса товар айланмасининг барқарор ўсиши учун шарт-шароитлар
яратиш масаласи кўрилди. Бунда Тадбиркорлик кенгаши асосий ўрин тутади. Қозоғистон ва Шимолий Македония давлат
органлари ҳамда тадбиркорлик доиралари иштирокида бўлиб ўтган бизнес-форумда тегишли
келишув имзоланди. Томонлар Инвестициялар жалб этиш ва экспортни илгари суриш
бўйича ҳамкорлик тўғрисида меморандум имзолади. Савдо, транзит йўналишларни ва
саноат кооперациясини ривожлантириш лойиҳалари катта қизиқиш уйғотди. Бизнес-форум
давомида қиймати 500 миллион тенге бўлган шартномалар тузилди.
Арман Шаққалиев,
Қозоғистон Республикаси Савдо ва интеграция вазири:
- Биз Шимолий Македонияни
Қозоғистоннинг Болқон яриморолидаги истиқболли ҳамкори сифатида кўряпмиз.
Қозоғистоннинг экспорт салоҳияти 320 миллион доллардан зиёд. Айни вақтда, Қозоғистон
Европани Осиё билан боғловчи асосий транспорт-логистика хаби вазифасини
бажаради. Ўрта йўлак маҳсулот етказиб беришда барқарор ва самарали занжир бўла
олади. Шимолий Македониянинг жўғрофий жойлашуви Болқон ва Жанубий-Шарқий Европа
давлатларига олиб чиқишда муҳим ҳалқага айланиши учун имкон яратади.
Абдумалик Сарманов таржимаси
Ўхшаш янгиликлар
