Казакстанда жеке жактар үчүн банкроттук процедурасынын үч түрүн киргизүү пландалууда. Юридикалык, соттон тышкаркы, соттук жана төлөө жөндөмдүүлүгүн калыбына келтирүү процедуралары бекитилет. Документти иштеп чыгууда мыкты эл аралык тажрыйбаларга негизделген. Тиешелүү мыйзам долбоору менен парламентте өлкөнүн каржы министри Ерулан Жамаубаев тааныштырды. Андагы сунуштар депутаттар тарабынан биринчи окууда жактырылды. Алгачкы жол-жобо банктарга, микрофинансылык уюмдарга жана инкассаторлорго карызы 4,9 миллион теңгеден ашпаса жана карызкордун расмий кирешеси болбосо же кирешеси жашоо минимумунан аз болсо колдонулат. Бул суммадан ашкан карызы бар жарандар банкроттук жөнүндө арыз менен кайрыла алышат. Бирок, бул учурда мүлкү конфискацияланып, карызды жабуу үчүн сатыкка коюлат. Ал эми туруктуу киреше булагы болгон учурда, төлөөгө жөндөмдүүлүктү калыбына келтирүү тартиби карызды төлөө үчүн соттун чечими менен бөлүп төлөө планын алуу мүмкүнчүлүгүн карайт.
Ерулан Жамаубаев, каржы министри:
Банктар биринчи кезекте экономиканы насыялоого аракет кылышы керек. Ал эми микрофинансылык уюмдар өз ишин чакан жана микро бизнестин өкүлдөрүнө насыя берүүгө багытташы керек. Алар болсо элди карызга батырып, мүлкүн тартып алуу менен алек болуп жатат. Мыйзамда атайын жобо бар. Эгерде турак жайы бирден-бир күрөө предмети болуп саналса, анда карызкор аны соттун банкроттук жараянынын жүрүшүндө алууга укуктуу. Жалгыз үй күрөөгө коюлбаса, карызкорлор аны талап кыла албайт делинген.
Которгон: Илгиз Жамалбеков
