Казакстанда креативдүү индустрияга колдоо күчөтүлөт

Казакстанда креативдүү индустрияны колдоо күчөтүлөт. Мажилис депутаттары креативдүү индустрияны колдоо жана өнүктүрүү маселелери боюнча мыйзам долбоорун экинчи окууда кабыл алды. Документ Сенатка кароого жөнөтүлдү. Мыйзам долбоору креативдүү секторду системалуу мамлекеттик колдоону түзүүнү жана ишмердүүлүгүн жөнгө салууну карайт. Мыйзам үстүндө иштөө учурунда депутаттар маданият, жаштар саясаты жана кинематография жөнүндөгү мыйзамдарга түзөтүүлөрдү киргизишти. Ошентип, документ жаштардын демилгелерин колдоо чараларын кеңейтүүнү, улуттук кинону каржылоого болгон мамилелерди тактоону карайт. Маданият жана маалымат министрлигине жеке инвестицияларды тартууга мониторинг жүргүзүү укугу бекитилип, акимчиликтерге креативдүү ишкердүүлүктү өнүктүрүү жана таланттарды өз алдынча ишке ашыруу боюнча ыйгарым укуктар берилет. Ошондой эле, маданий-массалык иш-чараларды жана кинопрокат тартибин жөнгө салуу күчөтүлдү. Мыйзамдын ишке ашырылышы менен креативдүү бизнестин өсүшү үчүн ачык шарттар түзүлүп, тармактын өлкө экономикасына кошкон салымы көбөйөт деп күтүлүүдө.

Нургуль Тау, Парламент Мажилисинин депутаты:

- Мыйзам долбоору чыгармачылык ишмердүүлүктү жүзөгө ашыруу тартибин андан ары жөнгө салууга багытталган. «Креативдүү индустрия кызматкери» жана «Креативдүү индустрия субъекттеринин реестри» түшүнүктөрү киргизилүүдө. Маданият жана маалымат министрлигинин чыгармачыл индустриялар чөйрөсүндөгү долбоорлорго жеке инвестицияларды тартуу мониторингин жүргүзүү боюнча укук белгиленген. Акимчиликтерге креативдүү индустриялар чөйрөсүндөгү ишкердикти өнүктүрүү аркылуу таланттарды өз алдынча ишке ашыруу жана өнүктүрүү үчүн шарттарды түзүү боюнча укук берилет. Чыгармачылык эркиндиги жана кесиптик өнүгүү максатында чыгармачыл индустрия кызматкерлеринин укуктарын коргоо боюнча ченемдер каралган.

Которгон: Илгиз Жамалбеков

Веб-редактор: Айнұр Досан