Voice Beyond Horizon жобасы Қазақстанның туристік әлеуетін ашады

Астанада «Көкжиектен тыс дауыс» - Voice Beyond Horizon халықаралық телевизиялық жобасы таныстырылды. Түсірілімдер қыркүйек айында елдің алты өңірінде өтті. Бұл Қазақстан мен Қытайдың бірлескен жобасы. Бастаманы қолға алған әрі атқарушы продюсер - Димаш Құдайберген. Әншінің сөзінше, байқаудың басты мақсаты – әлемге еліміздің әсем табиғаты мен мәдени мұрасын паш ету. Ол үшін барлық қатысушы алдымен Қазақстанның қалалары мен көрікті жерлерін аралауға шықты. Олардың ішінде Қазақстан, Қытай, Қырғызстан, Италия, Малайзия және Сербия елдерінің өнерпаздары бар. Музыкалық саяхат Ұлы Жібек жолы жүрегі – Түркістаннан басталып, Каспий теңізі жағалауы мен бірегей Бозжыра пейзажында жалғасты. Одан кейін Алматы өңірінің мәдени інжу-маржандарымен ұштасып, Қазақстанның елордасы – Астанада аяқталды. Ұйымдастырушылардың сөзінше, жоспарда 8 конкурстық раунд өткізу көзделген. Бұдан бөлек 4 эфир Қазақстанның тарихы мен туристік әлеуетіне арналады.

Димаш Құдайберген, Қазақстанның халық әртісі

- Мен сондай-ақ жас ұрпақ үшін мүмкіндіктер жасауға ден қойдым. Жобаға Қазақстаннан орындаушы ретінде өнер көрсеткен біздің Нұржас та қатысты. Ол өз міндетін өте жақсы атқарды және осы бағытта дамуын жалғастыруда. Жобадан кейін бізде Қазақстаннан халықаралық деңгейдегі тағы бір жұлдыз пайда болады деп үміттенемін.

Веб-редактор: Нұрбек Балгүл Қайрошқызы