Қазақстанда вокзалдарды ауқымды жаңғырту жүргізілуде

Қазақстанда теміржол вокзалдарын ауқымды жаңғырту жұмысы жалғасуда. Қыркүйек айының соңына дейін ел аумағында 124 нысан жаңарады. Жоба Мемлекет басшысының тапсырмасы бойынша жүзеге асырылуда. Жөндеу жүргізілетін нысандардың қатарында «Алматы-1» вокзалы да бар. Мұнда ескірген инженерлік желілер бұзылып, перрон жаңартылады, нысан уақытша электрмен жабдықтау жүйесіне көшкен. Сонымен қатар, заманауи технологиялық жабдықтар орнатылмақ. Өткен ғасырдың 70-ші жылдары салынған ғимараттың тарихи келбетін қалпына келтіру жоспарланып отыр. Осы мақсатта әрлеу жұмыстарына табиғи тас пайдаланылады. Бүгінгі таңда нысанның 40% жұмысы атқарылған.

Ерсұлтан Ержанов, ҚР Көлік министрлігінің бас сарапшысы:

- 34 бірлік арнайы техника, 500-ден астам жұмысшы жұмылдырылды, түнгі және күндізгі ауысым кестесі ұйымдастырылды. Нысандағы құрылыс аяқталғаннан кейін біз заманауи, жайлы және ең бастысы қауіпсіз вокзалға қол жеткіземіз. Сондай-ақ, қозғалысы шектеулі азаматтарға ерекше көңіл бөлініп, қажетті қосымша жағдайлар жасалады.

Веб-редактор: Berekekyzy Aiym