Түрікменстанда өңірлік кедендік оқу орталықтарын дамыту талқыланды

Түрікменстан астанасында өткен халықаралық семинарда өңірлік оқу орталықтарының кедендік байланыстарды нығайтудағы рөлі талқыланды. Әзірбайжан, Ресей, Жапония, Иран және Венгриядан келген форум қатысушылары алаңның мүмкіндіктерін бағалады. Атап айтқанда, Ашхабадтағы Өңірлік оқу орталығының халықаралық мәртебесі әлемнің жетекші сарапшыларының қатысуымен тренингтер өткізуге мүмкіндік береді. Ал оқыту бағдарламалары халықаралық стандарттарға сай келеді, бұл мамандарға теориялық білімді кеден ісі практикасына жедел енгізуге көмектеседі. Қатысушылар инспекциялық-тексеру кешендерінің заманауи рентген жабдықтарымен жұмыс істеу ерекшеліктерін талқылады.

Антонио Ло Парко, Дүниежүзілік кеден ұйымының институционалдық даму жөніндегі еуропалық өңірлік офисінің директоры:

- Түрікменстанда осы алаңның пайда болуы кеден желісінің бірігіп жұмыс істеуіне және ауқымды мемлекетаралық бастамаларды іске асыруға мүмкіндік береді. Бұған қоса, өңір ішілік үйлестіруді күшейту үшін Дүниежүзілік Кеден Ұйымы мамандандырылған IT-платформа енгізеді. Ол барлық сегіз оқу орталығын бірыңғай ақпараттық жүйеге біріктіреді. Интеграция сарапшыларға үздік тәжірибемен жедел алмасуға және ағымдағы жобаларды нақты уақыт режимінде үйлестіруге мүмкіндік береді.

Дашгин Алиев, Дүниежүзілік кеден ұйымының еуропалық өңірдегі даму жөніндегі менеджері:

- Ашхабадтағы кездесу мамыр айының соңында өтетін еуропалық өңір орталықтары басшыларының үлкен жиынының негізгі дайындық тұғырнамасы болып табылады. Бұл жерде көтерілген тақырыптар жоғары деңгейдегі болашақ пікірталастардың негізіне айналады.

Веб-редактор: Айнұр Досан