Солтүстік Қазақстан облысында Республика күніне орай креативті индустрия орталығы халық игілігіне тапсырылды. Жаңадан ашылған хабтың мақсаты – заманауи қазақ өнерінің дамуына ықпал ету. Кешенде 35 жасқа дейінгі дарынды жастар өз ұсыныстарын әзірлеп, медиа және диджитал жаңалықтар, контент өндірісі, fashion индустриясы, хореография, кинематография және ақпараттық технологиялардың қыр-сырын меңгереді. Бұдан басқа шығармашылық кеңістікте шеберлік сыныптарын ТМД елдерінен шақырылған сарапшылар өткізеді.
Айта кетейік, мұндай орталықтарды өңірдің барлық аудандарында ашу жоспарланған.
Темірлан Айтмахамбетов, креативті орталықтың президенті:
– Қазір біз «Ою Лаб» кабинетінде тұрмыз. Мұнда фильм, ойын және коммерциялық мақсатқа қажетті заттардың 3d модельдері жасалынады.
Нұргүл Болатова, креативті индустрия орталығының бөлім басшысы:
– Бұл орталық жастарға бағытталған. Яғни, хабқа жоғары сынып оқушыларын, студенттерді, өз өнімдері мен қызметтерін жасап, дамып-жетілгісі келетін белсенді ұрпақты тартамыз. Біз тың ойлардың авторлары, айти мамандары мен жергілікті бизністің басын қосамыз. Жастар өздерінің жобаларын таныстырып, олардың жүзеге асуына қаржы тарта алады.
Жеңіс Ермұқанов.
