Silk Way Star әнұраны Қытайда орындалды

Silk Way Star халықаралық вокалдық байқауының көкжиегі кеңейіп келеді.  Музыкалық жобаның әнұраны Қытайдың Чунцинь қаласында өткен V медиа-инновациялар форумында шырқалды.

Жиын алаңында жаңа компазицияны байқаудың екінші маусымында Қазақстан атынан сынға түсетін Рухия Байдүкенова мен бірінші маусымының финалисі, қытайлық әнші Чжан Хэ Сюань орындады. Туындының авторы - қазақстандық композитор Хамит Шанғалиев. Форумға қатысушылардың айтуынша, бұл  жарқын оқиға Қазақстанның Жібек жолы кеңістігіндегі халықаралық мәдени ынтымақтастықты дамытудағы рөлін айшықтайды. Айта кетейік, халықаралық байқау - Қазақстан Республикасы Президентінің Телерадиокешені мен аспан асты елінің  China Media Group медиакорпорациясы бірлесіп ұйымдастырған ауқымды жоба. Өнер додасының Гранд-финалы алғаш рет былтыр Астанада өтті. Ол бірнеше елде тікелей эфирден көрсетілді. Жалпы, бірегей жобаны 43 мемлекетте 143 млн астам адам тамашалады.

Веб-редактор: Нұрбек Балгүл Қайрошқызы