Қазақстан туристік бағыттардың әлемдік рейтингінде 52-орынды иеленді

Қазақстан туризмді дамыту индексінде нәтижесін жақсартты. Еліміз әлемдік туристік бағыттар тізімінде 119 ел арасынан 52-орынды иеленді. Дүниежүзілік экономикалық форумның саяхат пен туризмді дамыту туралы есебінде белгілі болды. Жалпы, әлемдік рейтингте Қазақстан 14-сатыға көтеріліп, Орталық Азиядағы өзге елдерді басып озды. Туризмнің әлеуметтік-экономикалық әсері, денсаулық сақтау және гигиена, табиғи және мәдени ресурстар, сондай-ақ адами капитал мен еңбек нарығы және туристік инфрақұрылым мен сервис санаттарында еліміз жоғары бағаларға ие болды.

Алишер Тұрсын, «Kazakh Tourism» Ұлттық компаниясының ресми өкілі:

– Бұл өте керемет жаңалық. Біз алдағы уақытта осы рейтингтегі үздік 50 елдің қатарына кіруді жоспарлап отырмыз. Ол жоспарға 2 қадам жақын табан тіредік. Бұл нәтижеге орталық мемлекеттік органдардың, жергілікті атқарушы биліктің, бизнес ассоциациясы мен ғылыми-академиялық қоғамдастықтың бірлескен жұмысының арқасында жеттік. Алайда, осымен тоқтап қалмақ емеспіз. 50 ғана емес, үздік 30 елдің қатарына кіру үшін осы жұмысты жалғастыруымыз қажет.

Веб-редактор: Maya