Қазақстан Президенті Өзбекстан Сенатының төрағасын қабылдады

Қазақстан Президенті Өзбекстан Олий Мәжілісі Сенатының төрағасымен парламентаралық байланыстарды дамыту мәселелерін талқылады. Қасым-Жомарт Тоқаев Танзила Нарбаеваның Астанаға сапары елдеріміз арасындағы стратегиялық ынтымақтастықтың айрықша сипатта өрбіп келе жатқанын растайтынын атап өтті. Өз кезегінде, Танзила Нарбаева Қазақстан Өзбекстан үшін ең жақын серіктес және ел басшылығы нәтижеге бірлесіп жұмыс істеуге ниетті екенін жеткізді. Тараптар сауда-экономикалық және инвестициялық ынтымақтастықты одан әрі дамыту, сондай-ақ мәдени-гуманитарлық байланыстарды нығайту мәселелерін талқылады. Мемлекет басшысы Танзила Нарбаеваны II дәрежелі «Достық» орденімен марапаттады.

Қасым-Жомарт Тоқаев, Қазақстан Республикасының Президенті:

- Біз бауырлас Өзбек елімен ынтымақтастығымызды дамытуға ерекше мән береміз. Мұны Орталық Азия өңіріндегі тұрақтылық пен қауіпсіздікті сақтауда өте маңызды фактор деп санаймыз. Екі елдің ықпалдастығы неғұрлым тығыз әрі табысты өрбіген сайын, жалпы өңірдегі жағдай да тыныш болады. Сіздің сапарыңыз парламентаралық байланысты кеңейту үшін шын мәнінде маңызды рөл атқарады.

Веб-редактор: Айнұр Досан