Қасым-Жомарт Тоқаев елдің бірқатар өңірінде болған су тасқыны салдарынан туындаған төтенше жағдайға байланысты шұғыл кеңес өткізді. Президент жағдайды қалыпқа келтіру үшін шұғыл шаралар қабылдаумен қатар жүйелі жұмыс қажет екенін атап өтті. Мемлекет басшысы Республикалық штаб құру, барлық өңірде су тасқынына қарсы жұмыстарды күшейту, ең бастысы, азаматтардың қауіпсіздігін қамтамасыз ету жөнінде тапсырма берді.
Елдің Премьер-Министрі Олжас Бектенов Су тасқынына қарсы іс-шараларды үйлестіру және зардаптарын жою жөніндегі штабтың отырысын өткізді. ТЖ аймақтарынан барлығы 11 мыңнан астам адам эвакуацияланды. Уақытша орналастыру бекеттерінде 5 мыңнан астам адам бар. Халыққа көмек көрсету тәулік бойы, оның ішінде әуе кемелерінің көмегімен жүзеге асырылуда. Жұмысқа 7 мыңнан астам адам, 2 мыңнан астам техника тартылды. Су шайып кеткен автожолдарды қалпына келтіру жұмыстары бақылауға алынды. Су қоймалары мен өзендердегі жағдайға мониторинг жүргізілуде. Әкімдіктер су тасқынының қаупі жоғары өңірлерде алдын алу шараларын жүргізіп жатыр. Қажет болған жағдайда қосымша күштер мен құралдар жіберіледі. Қираған үйлерді қалпына келтіру жұмыстары мен салуға қаражат Қазақстан Үкіметі мен әкімдіктердің резервтерінен бөлінетін болады.
Олжас Бектенов, ҚР Премьер-министрі:
- 11 мыңнан астам адам эвакуацияланды. Судың беті қайтқан жерлердегі үйлеріне бір бөлігі қайтып үлгерді. Дегенмен, көпшілігі әлі де өз қоныстарына қайта алмайды. Сондықтан, барлық қажеттіліктерімен қамтамасыз етілуі тиіс. Бұл жерде біз барлық ресурстарды өте нақты есептеп, адамдарға көмек көрсетуіміз керек. Біз бүгіннен бастап шығын көлемін бағалауды бастап, сонымен қатар адамдарға келтірілген залалды өтеуге көмектесуге бірден кірісуіміз керек. Ресурстар бар, бәрі қалпына келеді.
Веб-редактор: Айдана Нагиева
Сондай-ақ
