Қазақстанда білім беру гранттарына құжат қабылдау жүргізілуде

Қазақстанда білім беру гранттары байқауына қатысуға өтініштер қабылдау жүргізілуде. Осылайша, мектеп түлектері мемлекет есебінен еліміздің жоғары оқу орындарына түсу мүмкіндігіне ие болады. Талапкерлер 20 шілдеге дейін университеттер мен институттардың қабылдау комиссиялары арқылы құжат тапсырады немесе виртуалды сервистерді және электрондық үкімет порталын пайдалана алады. Айта кетейік, бакалавриат бағдарламаларына 75 мыңға жуық грант бөлінді, олардың басым бөлігі техникалық мамандықтарға тиесілі. Оқуға түсушілер үшін ҰБТ нәтижелері бойынша ең төменгі шекті балдар белгіленген. Оның ішінде «Педагогикалық ғылымдар» және «Құқық» бағыты бойынша - 75, медициналық мамандықтар үшін - 70, ұлттық жоғары оқу орындарына түсу үшін - 65 және қалған оқу орындарына түсу үшін кемінде 50 балл қажет. Бұл ретте университеттер де қосымша талаптар қоя алады. Ал ауылдық жерлерден және халықтың әлеуметтік осал топтарынан шыққан талапкерлерге қолдау қарастырылған және мемлекеттік квоталар қолданылады. Айта кетейік, іріктеу процестерінің басым көпшілігі автоматтандырылған, бұл конкурстың ашықтығын арттырады. Білім гранты иегерлерінің есімдері 10 тамызға дейін белгілі болады.

Веб-редактор: Нұрбек Балгүл Қайрошқызы