Ақтауда ең ірі контейнерлік хаб іске қосылды

Ақтауда Каспий теңізіндегі ең ірі контейнерлік хаб іске қосылды. Нысан Қазақстан Президентінің тапсырмасы аясында салынған. Айта кетейік, жобаны «Қазақстан темір жолы» ұлттық компаниясы Ляньюньгань Қытай айлағымен және Ақтау халықаралық теңіз сауда портымен бірлесіп жүзеге асырды. Жаңа хаб транзиттік мүмкіндіктерді ұлғайтуға ықпал етеді. Сонымен қатар, Қазақстанның Шығыс - Батыс және Солтүстік - Оңтүстік халықаралық бағыттарындағы орнын нығайтуға мүмкіндік береді. Заманауи логистикалық инфрақұрылым біздің елімізде теңдесі жоқ озық технологиялармен жабдықталған. Бұл жүктерді өңдеуді едәуір жылдамдатуға мүмкіндік береді. Нысанның өткізу қабілеттілігіне келетін болсақ, ол жылына 66 мың контейнерге жетеді. Жұмыс Транскаспий көлік бағыты бойынша Қытайдан 100 мыңыншы контейнердің келуімен басталды. Айта кетейік, бұл дәліз Қытай мен Еуропа елдерін Қазақстан, Каспий теңізі, Әзірбайжан, Грузия арқылы жалғайды.

Дәурен Құтпанбаев, Ақтау қаласы халықаралық теңіз сауда порты басқарма төрағасының міндетін атқарушы:

- Бұл тек инфрақұрылымдық жоба ғана емес. Континенттер мен елдерді байланыстыратын болашаққа деген инвестиция. Бұл - бағыттардың болашағы. Қол жеткізілген уағдаластықтарды ең жоғары деңгейде орындаудың символы. 

Веб-редактор: Айнұр Досан