Қозоғистонда 2025 йилнинг биринчи яримйиллигида кичик ва ўрта бизнес ишлаб чиқарган маҳсулот ҳажми 43 триллион тенгегача, 25 фоизга ўсган. Миллий иқтисодиёт вазирлиги маълумотига кўра, бир йўла 5 та асосий соҳа – савдо, ишлаб чиқариш саноати, қурилиш, транспорт ва омборлаштиришда, шунингдек, қишлоқ, ўрмон ва балиқ хўжалигида ўсиш кузатилди. Умуман, мамлакат ЯИМда кичик ва ўрта бизнес улуши деярли 40 фоизга етди. Секторда банд бўлганлар сони эса 4 миллион 400 минг кишини ташкил қилди. Дарвоқе, бу иқтисодий фаол аҳолининг деярли учдан бири. Ишбилармонлар фаоллиги ошган бир пайтда, Қозоғистонда тадбиркорларни қўллаб-қувватлаш чоралари кучайтириляпти. Европа Тикланиш ва Тараққиёт Банки билан биргаликда ўрта бизнес корхоналари учун ишлаб чиқаришни икки-уч марта кенгайтириш режалари тайёрланмоқда. Компаниялар учун диагностика ўтказилиб, тараққиётнинг индивидуал режаси шакллантирилади.
Ерлан Сағнаев, Қозоғистон Республикаси Миллий иқтисодиёт вазири ўринбосари:
- Ўрта бизнес бугун ишлаб чиқариш саноатига қаттиқ эътибор қаратган, бу кичик ва ўрта тадбиркорликда олинган маҳсулот умумий ҳажмининг тахминан 12 фоизи. Келгусида ўсиш учун сезиларли салоҳият сақланиб қолмоқда. Бундан ташқари, кўрсатилган соҳалар кенгайиш салоҳиятига эга, ҳозирда мавжуд ишлаб чиқариш қувватлари, ўрта бизнесни ҳам қўшганда, бугун тўла ҳажмда ишлатилмаяпти. Давлат эътибори ўрта бизнесни, ЕТТБ билан ҳамкорликда шу соҳаларни ривожлантиришга йўналтирилади.
Айни пайтда, рақамлаштириш ислоҳотларнинг асосий элементи бўлиб қолмоқда. Янгиланган Egov Business мобиль иловаси ишга туширилгани, «Бизнес рақамли харитаси» яратилгани тадбиркорларга хизматларни «ягона дарча» тартибида олиш имконини беради. Ҳозирга қадар 3 ярим миллиондан зиёд рақамли хизмат кўрсатилган, фаол фойдаланувчилар сони эса 78 мингдан ошган.
Абдумалик Сарманов таржимаси
Ўхшаш янгиликлар
