Қозоғистон
Президенти Шанхайда сунъий идрок бўйича Бутунжаҳон конференциясининг очилиш
маросимида иштирок этди. Қосим-Жўмарт Тўқаев ўз нутқида форум дунё аҳлининг ушбу йўналишдаги улкан
ютуқларини акс эттиришини таъкидлади. Бугунги
кунда сунъий идрок ечимлари соҳасидаги энг кўп патент эса хитойликларга тегишли. Давлат раҳбари "Сунъий идрок барча
учун" концепциясини қўллаб-қувватлади ва ХХР Раиси Си Цзинпиннинг стратегик қарашларини юқори баҳолади.
Қосим-Жўмарт Тўқаев, Қозоғистон Республикаси Президенти:
- 2029 йил октябрь ойида Хитой Халқ Республикасининг 80 йиллиги нишонланади. Саксон йил – бир
инсон умри. Бу муддатнинг ярмини Хитой сиёсий ва иқтисодий инқирозларнинг
ҳалокатли оқибатлари билан курашга сарфлади. Сўнгра атиги 40 йил ичида
Хитой ўз тараққиётида ақл бовар қилмас ютуқларга эришди, қашшоқлик муаммосини
тўлиқ енгиб ўтди, ўта юқори технологияларни ўз ичига олган кенг диверсификациялашган иқтисодиётга эга
глобал супер кучга айланди.
Сунъий идрок иқтисодиёт, савдо ва глобал ўзаро боғланишнинг келажагига ҳал
қилувчи таъсир кўрсатадиган соҳага айланмоқда. 2033 йилга бориб жаҳон сунъий
идрок бозори ҳажми қарийб 5 триллион долларга етиши кутилмоқда. Шу боис,
Қосим-Жўмарт Тўқаев таъкидлашича, ижтимоий таъсирга эга янги технологияларини
бошқариш мажмуавий шаклда амалга оширилиши ва яримўтказгичлар
ҳамда маълумотларни қайта ишлаш марказларидан тортиб ахлоқ, таълим ва инсон
қадр-қимматини ҳимоя қилишгача бўлган ягона занжирнининг барча ҳалқаларини қамраб олиши лозим.
Қосим-Жўмарт Тўқаев, Қозоғистон Республикаси Президенти:
- Сунъий идрок инсоннинг моҳирона ва оқилона бошқаруви
остида қолиши керак. Айнан шунинг учун Қозоғистон Сунъий идрок соҳасида
ҳамкорлик бўйича Бутунжаҳон ташкилоти ташкил этиш тўғрисидаги қарор тарихий
аҳамиятга эга, деб ҳисоблайди. Ишончим комилки, ушбу ташкилот сунъий идрокни
бошқаришнинг универсал архитектураси пойдеворига айланиши мумкин. У инсоният
фаровонлиги ва хавфсизлигини таъминловчи ҳамкорлик воситасига айланиши
лозим.
Қозоғистон Президенти Астанада Сунъий идрок соҳасида
ҳамкорлик бўйича Бутунжаҳон ташкилотининг инаугурация йиғилишини ўтказиш ва
мамлакатда Марказий Осиё минтақавий ваколатхонасини жойлаштиришни таклиф қилди.
Бундан ташқари, ташкилот шафелигида сунъий идрок ечимлари соҳасида тажриба
алмашиш учун мактаблар ва марказларнинг халқаро тармоғини очиш, сунъий идрок
соҳасидаги стандартлар, ахлоқий
қоидаларни тартибга солиш ва ишлаб чиқиш учун эксперт платформасини
яратиш зарур.
Қосим-Жўмарт Тўқаев, Қозоғистон Республикаси Президенти:
- Асосий мақсади рақамли савдони ривожлантиришни
рағбатлантириш ва "Ягона макон – ягона йўл" ташаббуси доирасида рақамли иқтисодиётлар интеграциясининг амалий
моделини яратишдан иборат бўлган "Қозоғистон – Хитой рақамли кўприги"
ташаббусини ишга туширишни таклиф қиламиз. Ишлаб чиқариш, тоғ-кон саноати,
энергетика, қишлоқ хўжалиги, соғлиқни сақлаш ва сув ресурсларини бошқариш каби
соҳаларда сунъий идрокни хавфсиз ва кенг миқёсда жорий этишни жадаллаштиришимиз
керак.
Абдумалик Сарманов таржимаси
Ўхшаш янгиликлар
-tDvVdDoHSO.jpg)
