Қозоғистонда СИ йўл сифатини назорат қилади

Қозоғистондаги республика аҳамиятига эга «Екатеринбург – Алмати» автотрассасидаги 30 километрли участка капитал таъмир қилина бошлади. Сунъий идрок ёрдамида қилинган йўл қопламаси таҳлили баъзи жойлар тегишли стандартларга мос эмаслигини кўрсатди. Ҳозир мутахассислар асфальт қоплама пишиқлиги ва текислигини тўртта камера ва «ақлли» сенсорлар билан жиҳозланган мобил лаборатория ёрдамида текширишяпти. Эксперт айтишича, автоматлашган янги тизим назорат жараёнини анча осонлаштирди: авваллари 100 километрли йўлни текширишга 4 кун сарфланса, ҳозир 3-4 соат кетади.

Жўлдибай Тентеков, Йўл активлари сифати миллий маркази филиали директори:

- Буюртмачилар ўртача таъмир ишлари ўтказишни режалаштирганди. Лекин тегишли таҳлиллардан сўнг сунъий интеллект капитал таъмирга киришишни маслаҳат берди. Буюртмачи ҳам капитал таъмир қилишга рози бўлди.

Йўл қопламаси дефектларини Қозоғистон кашфиётчиларининг яна бир ускунаси аниқлаб беради. Jolscan компьютер нигоҳи технологиясидан фойдаланган ҳолда «тез ёрдам» ва патрул автомобиллари олган видеони таҳлил қилади. Тизим тўпланган маълумот асосида мавжуд камчиликлар харитасини тузади, у дарҳол шаҳар коммунал хизматларига юборилади. Шу кунгача 500 тадан зиёд муаммоли йўл участкалари аниқланди, уларнинг ярмидан кўпроғи таъмирланди.

Рустем Қадиров, лойиҳа муаллифи:

- «Тез ёрдам»нинг олдинга қараган камераси ҳисобига йўлларни кузатамиз. Тўпланган видеооқим серверимизда қайта ишланади. Ва оддий СИ-модель йўлдаги чуқурларни кўрсатиб беради. Сўнгра уни интерфаол харитага чиқарамиз, шаҳар бўйлаб муаммоли жойлар белгиланади. Нуқтани очсангиз, унинг сурати, қачон рўйхатга олингани ва қаердалигини кўриб оласиз. Биз бу маълумотларни битталаб бориб кўришдан воз кечяпмиз дейишимиз мумкин.

Абдумалик Сарманов таржимаси