Инвестиция,
энергетика, логистика, атом саноати, қишлоқ хўжалиги, молия сектори,
рақамлаштириш ва сунъий интеллект. Қосим-Жўмарт Тўқаев ва Қозоғистонга расмий ташриф
билан келган Венгрия Президенти Тамаш Шуйок Ақўрдада бўлиб ўтган тор ва кенг
форматдаги музокараларда Қозоғистон ва Венгриянинг ушбу соҳалардаги
ҳамкорлигини муҳокама қилди. Қосим-Жўмарт Тўқаев таъкидлашича, икки томонлама
савдо-иқтисодий муносабатлар мустаҳкам асос ва катта салоҳиятга эга.
Қосим-Жўмарт Тўқаев,
Қозоғистон Республикаси Президенти:
- Сизнинг дастлабки
расмий ташрифингиз ўзаро ҳамкорлигимизнинг нуқтаи назаридан олганда жуда муҳим.
Венгрия мустақиллигимизни энг аввал тан олган Европа давлатларидан бири.
Будапешт эса расмий дипломатик миссиямизни биринчи бўлиб қабул қилган Европа
шаҳри. Шунинг учун биз мамлакатингиз билан кўп соҳаларда тиғизҳамкорлик
юритамиз. Бу йўналишдаги ҳаракат давом этишига аминман, у ҳар икки давлат
манфаатига хизмат қилади.
Ўтган йили ўзаро товар
айланмаси салкам 200 миллион долларни ташкил қилди. Жорий йилнинг саккиз ойида
бу кўрсаткич 22 фоизга ортди. Савдо ҳажмини 1 миллиард долларга етказиш мақсад
қилинган. Қозоғистон Президентининг 2024 йилдаги Венгрияга ташрифи давомида қатор
шартномалар тузилди. Ҳозир Қозоғистонда 35 та венгер компанияси ишлаб турибди. Мамлакатга
киритилган инвестиция ҳажми 400 миллион долларни ташкил қилди.
Қосим-Жўмарт Тўқаев,
Қозоғистон Республикаси Президенти:
- MOL компанияси
Қозоғистон газ соҳасида фаол ишлаяпти. Бошқа кенг кўламли лойиҳалар устида ҳам
иш давом этяпти. Шунингдек, бизда UBM Group, Gedeon Richter, Globalia каби
йирик корпорациялар ҳам ишлаб турибди. Бугунги кунда 20 та қўшма лойиҳа рўёбга
чиқариляпти. Биз инвестициявий ҳамкорликни кенгайтиришдан манфаатдормиз. Шу
сабабли энергетика, атом саноати ва қишлоқ хҳжалиги соҳаларида бирга ишлаш
ниятидамиз.
Давлат раҳбари
маданий-гуманитар алоқаларни «қозоқ-венгер муносабатларининг олтин ўзаги», деб
атади. Ҳар йили 250 нафар Қозоғистон талабаси венгер университетларида таълим
олади. Қозоғистон Президенти таъкидлашича, олий таълим даргоҳлари кўпроқ
венгриялик талабаларни қабул қилишга тайёр. Ўз навбатида, Тамаш Шуйок Қозоғистон
билан муносабатлар стратегик муҳимлигини билдирди.
Тамаш Шуйок, Венгрия
Президенти:
– Биз Қозоғистондаги
рақамлаштириш жараёнини катта қизиқиш билан кузатяпмиз. У минтақа ва дунё
миқёсида пешқадам. Мамлакатингизни бу соҳадаги нуфузли ҳамкор, деб биламиз ва
икки томонлама ҳамкорлик ривожланишига умид қиламиз. Венгер-қозоқ
муносабатларининг салоҳияти катта. Венгрия Президенти сифатида унинг рўёбга
чиқарилишини ҳар томонлама қўллаб-қувватлайман.
Қосим-Жўмарт Тўқаев
Тамаш Шуйокнинг ҳамкорликни мустаҳкамлашга қўшган ҳиссасини юқори баҳолади ва
уни 1 даражали «Дўстиқ» ордени билан мукофотлади. Президент Шуйок кўрсатилган
ҳурмат учун миннатдорчилик билдирди, ҳамиша қозоқ-венгер дўстлиги тарафдори
бўлишини таъкидлади.
Абдумалик Сарманов таржимаси
Ўхшаш янгиликлар
