Ақўрдада бугун Сербия
Президентини тантанали кутиб олиш маросими ўтказилди. Александр Вучич
Қозоғистонга расмий ташриф билан келди. Томонлар тор ва кенгайтирилган таркибда
музокара олиб борди. Президент Қосим-Жўмарт Тўқаев Қозоғистон Сербияни Европадаги муҳим стратегик ҳамкор
сифатида кўришини, ушбу ташриф ўзаро алоқаларга янги туртки беришини таъкидлади.
Жорий йилда Астана ва Белград дипломатик алоқалар ўрнатилганининг 30 йиллигини
нишонляпти. Ўтган давр мобайнида мамлакатлар ўртасида икки томонлама алоқалар
кенгайди. Савдо фаол ривожланяпти. Ўтган йил якунларига кўра, товар айланмаси 108
милион долларни ташкил қилди. Айни вақтда, Қозоғистон экспорти 80 фоиздан ошди.
Шу кунларда республикада 60 тадан зиёд серб компанияси самарали ишлаяпти. Икки
мамлакат пойтахтлари ўртасида доимий авиаалоқа ўрнатилган.
Қосим-Жўмарт Тўқаев, Қозоғистон
Республикаси Президенти:
– Биз муносабатларни янада
мустаҳкамлаш, турли соҳаларда ўзаро фойдали ҳамкорликни ривожлантиришга
ниятидамиз. Бугун биз мана шу ҳамкорликка қандай қилиб қўшимча динамика бериш
мумкинлигини муҳокама қилдик. Ишонтириб айтаманки, биз ўз томонимиздан
давлатларимиз ўртасида алоқаларни кенгайтириш учун бор кучимизни берамиз.
Александр Вучич илиқ кутиб олгани
учун Қосим-Жўмарт Тўқаевга миннатдорчилик билдирди. Белграднинг Астана билан
кўп қиррали ҳамкорликни кенгайтиришга тайёрлигини тасдиқлади. Шу жумладан, Сербия
Президенти Қозоғистон компанияларининг, аввало, қурилиш, мудофаа саноати, сунъий
интеллект, маълумотларни қайта ишлашдаги қўшма лойиҳалардаги иштирокини
кенгайтиришдан манфаатдорлигини таъкидлади.
Александр Вучич, Сербия Президенти:
– Биз Қозоғистон таклиф этган, фақат
Сербия учун эмас, Европанинг мана шу қисми учун ҳам пешқадамликка эриша
оладиган қатор лойиҳаларни рўёбга чиқаришда қатнашишга тайёрмиз. Бизда
мамлакатингизнинг ишончли қурилиш компаниялари ва инвесторларини кўришни
истардик. Бу Сербиянинг инвестициявий жозибадорлигини оширади ва ўзаро маданий,
туристик алоқаларни кенгайтиради. Биз ўз томонимиздан мамлакатингизга инвестицияларини
йўллашни истаган серб тадбиркорларини ҳар томонлама қўллаб-қувватлаймиз.
Музокаралар якунига кўра, Қозоғистон ва
Сербия президентлари Қўшма баёнот қабул қилди. Томонлар сунъий интеллект, рақамли тараққиёт, инвестиция, қишлоқ хўжалиги, фан ва таълим соҳаларида 10 та ҳамкорлик меморандумини имзолади.
Мамлакатлар орасидаги алоқаларни мустаҳкамлашга қўшган ҳиссаси учун Қосим-Жўмарт Тўқаев Александр Вучичга Қозоғистоннинг олий давлат мукофоти – «Олтин бургут» орденини топширди.
Абдумалик Сарманов таржимаси
Ўхшаш янгиликлар
