V Бутунжаҳон кўчманчилар ўйинлари этноспорт турлари бўйича ўтказиладиган энг йирик халқаро тадбирга айланди. Туркий халқларга оид бу анъанавий беллашувни бутун дунё кузатаяпти. Жорий йилдаги шиддатли тортишувлар ҳам бунга сабаб бўляпти. Астанада 90 га яқин давлатдан 2 минг нафардан зиёд спортчи тўпланди. Улар ичида олис хориждан келган арқон тортишуви, аудариспақ, қушбегилик, кўкпар каби ўйинлар билан шуғулланаётган олис хорижликлар ҳам кўп.
Ғани Ахметбаев, кўкпар бўйича бош ҳакам:
- Бешинчи Бутунжаҳон кўчманчилар ўйинларида кўкпар бўйича 9 давлатнинг терма жамоаси келди. 104 нафар спортчи рўйхатга олинди.
Қозоқ халқининг анъанавий усулда камон отиш мусобақаларида қатнашишни истаганлар ҳам кам эмас. Бу борада куч синашиш учун 33 давлатдан 180 нафар вакил келган. Мерганлар қаторида европаликлар ҳам етарлича бор.
Герреро Гальего, спортчи, Испания:
- Испаниядан мусобақаларда қатнашиш учун келдик. Рафиқам Соледат билан бирга 12 йилдан буён бу спорт мусобақаларида қатнашамиз. Иккимиз ҳам 80 ёшга яқинлашганмиз. Келажакда Қозоғистонда ўтказиладиган шундай тадбирлардан четда қолмаслик ниятидамиз.
Қозоқ қизи Арай Какимжанова Кўчманчилар ўйинларида Италия давлати шарафини ҳимоя қиляпти. У 4 йил илгари хорижлик йигитга турмушга чиққан. Касбий спортчи.
Арай Какимжанова, спортчи, Италия:
- Кўчманчилар ўйинлари Астанада ўтишини билганимиздан кейин «Италияликларни бу ўйинларга олиб борсак бўлмайдими?» деган фикр туғилди. Етти нафар спортчи келди, улардан икки нафари - аёллар. Бундаги спорт ўйинлари низоми Италиядаги қоидалардан фарқ қилади. Бу ерда янги тажриба орттираяпман.
Дунёда биринчи бўлиб отларни хонакилаштирган Буюк Дашт тамаддуни турли маданиятларни боғловчи олтин кўприкка айланди. Кўчманчиларнинг ворислари бу ҳамкорликни замонага мос шаклда давом эттиряпти. Шу жумладан, Бутунжаҳон кўчманчилар ўйинларини ўтказяпти.
Абдумалик Сарманов таржимаси
Ўхшаш янгиликлар
