Бугун Қосим-Жўмарт Тўқаев Миллий тинчлик ўрнатувчи контингент ҳарбий хизматчилари билан учрашди. Аскарлар мамлакат зиммасига олган масъулиятли миссияни юқори даражада адо этишди, дея таъкидлади Президент. Қуролли кучларимиз армия ва давлат обрўсини кўтарди, жасурлигини намойиш қилди. Таъкидлаш лозимки, республика аскарлари 2014 йилдан буён БМТ тинчлик ўрнатиш амалиётларида иштирок этади. 80 нафар қозоғистонлик бир қанча миссияларда кузатувчи бўлган. 700 нафаридан кўпроғи эса халқаро ташкилотнинг махсус амалиётларида қатнашди. Бугунги кунда 158 нафар аскар Африка ва Яқин Шарқдаги тинчлик ўрнатиш кучлари сафида хизмат қиляпти. Олий Бош қўмондон хизматчиларнинг юқори даражада тайёргарликдан ўтганини ҳам таъкидлади. Қисқа муддат ичида уларни халқаро стандартлар асосида ўқитиш ва тегишли анжомлар билан жиҳозлаш ишлари амалга оширилди.
Қосим-Жўмарт Тўқаев, Қозоғистон Республикаси Президенти:
- Бу эса Қозоғистон армиясининг энг мураккаб вазифаларни ҳам бажара олишини кўрсатади. Сурияда юзага келган ҳал қилувчи вақтда оқилона ва жасурлик билан ҳаракат қилдингиз. Шу тариқа, Қозоғистон армиясининг юксак профессионал даражасини намойиш этдингиз. Бутун дунё ҳамжамияти қозоқ аскарининг қўрқмаслиги ва жасурлигига шоҳид бўлди. Сиз қайноқ нуқталарда хизмат қиларкансиз, бой тажриба орттирдингиз. Энди билимларингизни боршқа аскарларга ҳам беришингизни кутамиз.
Ғўлон тепаликларида амалга оширилган амалиёт Қозоғистон байроғи остида ўтган биринчи мустақил тинчлик ўрнатиш миссияси бўлди. Натижада, БМТ билан ўзаро алоқалар янги даражага чиқди, дея таъкидлади Давлат раҳбари. Мамлакат ташкилотнинг бошқа миссияларида ҳам қатнашиш ва тинчлик-тотувликни мустаҳкамлашга хизмат қилиш ниятида. Аскарий бурчини намунали бажаргани, Ғўлон тепаликларида БМТ тинчлик ўрнатиш миссияси давомида кўрсатган жасорати ва фидокорлиги учун Қосим-Жўмарт Тўқаев ҳарбий хизматчиларга давлат мукофотлари топширди.
Абдумалик Сарманов таржимаси
Ўхшаш янгиликлар
