Латын алфавитине өтүү бул жөн гана тамгаларды алмаштыруу эмес, тилге жасалган чоң реформа. Бул тууралуу Тил комитетинин төрагасы Адилбек Каба телеканалга берген эксклюзивдүү маегинде билдирди. Серепчинин айтымында, учурда коомдо көптөгөн туура эмес түшүнүктөр, коркунучтар калыптанган. Латын алфавити казак элинин байыркы тарыхында болгон, эми ага кайра кайтуу жараяны жүрүп жатат. Ал эми алфавитке өтүү акырындык менен ишке ашат.
Адилбек Каба, РКнын Билим берүү жана илим министрлигинин Тил саясаты комитетинин төрагасы:
- Латын алфавити дегенди көптөр латынга өткөндөй кабыл алышат. Негизи латын алфавити тарыхыбызда болгон, бир кездери 10 жыл казак тили латын алфавитинде болгон. Азыр андан коркуунун эч кандай кажети жок. Мисалы, биз көчөдө кетип бара жаткан унаалардын номурларын карап көнүп калганбыз. Анын баары латын алфавитинде. Мисалы, сиз учакка билет сатып алдыңыз, же поездге билет алдыңыз, баары латын алфавитинде жүргүзүлөт.
Ошондой эле, спикер латын тилине өтүү жараяны учурунда тилди атайын үйрөткөн адистер алдын ала даярдаларын жана алардын тизмеси да даяр экенин билдирди.
Адилбек Каба, РКнын Билим берүү жана илим министрлигинин Тил саясаты комитетинин төрагасы:
- Алфавит кабыл алынгандан кийинки жылдын биринчи милдети орфографиялык, орфоэпиялык жана башка керектүү сөздүктөрдү басып чыгаруу болуп саналат. Ошол эле учурда, өлкөнүн бардык аймактарынан атайын репетиторлорду чакырып, бул жерден окутуп, учурда тизмелерин даярдап бүттүк. Биз аларды ушинтип үйрөтөбүз. Алар топ-тобу менен келип, билим алып, анан жергиликтүү элге латын алфавитин үйрөтүшөт.
Белгилей кетсек, тил реформасы дүйнөнүн улуу державаларында да кем калышпайт. Мисалы, АКШда 5 жолу, Францияда 2 жолу, Орусияда 4 жолу болгон. Тилчилердин айтымында, Казакстанда мындай реформа төртүнчү жолу жүргүзүлөт. Бүгүнкү күндө кириллицаны дүйнөнүн 4% колдонсо, 70% ашуун бөлүгү латын алфавитин колдонот.
Которгон: Илгиз Жамалбеков
Веб-редактор: Admin
Oкшош жаңылыктар
