Санариптик каттардын жана документтердин мазмунун таануу, веб-порталдарга
жана платформаларга кирүүгө мүмкүндүк алуу. Эми көрүүсү начар же көзү азиз
казакстандыктар учурда ушундай мүмкүнчүлүктөргө ээ. Алар үчүн Жогорку билим
берүү жана илим министрлигинин алдындагы «Тил-Казына» борбору атайын мобилдик
тиркеме иштеп чыкты. Анда экрандагы диктор көрүү мүмкүнчүлүгү чектелген
адамдарга казак тилиндеги тексттерди окууга жана смартфонду өз алдынча
колдонууга жардам берет. Уникалдуу IT долбоор Android түзмөктөрүнө жүктөө үчүн
жеткиликтүү.
Бауыржан Серикбай,
долбоордун жетекчиси:
- Бул
программаны иштеп чыгууга 6 айга жакын убакыт кетти. Биз колдонгон негизги
технология Text to speech деп аталат. Казак тилиндеги тиркеменин аналогу
бүгүнкү күндө эч жерде жок. Биздин борбордун кызматкерлери казакча сөздү жазма,
оозеки айтуу, башкача айтканда сөз синтезине айландырганыбыздын аркасында
ийгиликтерге жетишти.
Кенжегуль Сейтжан,
Парламент Мажилисинин депутаты:
- Казакстан Республикасы 2015-жылы Майыптардын укуктары жөнүндө конвенцияны ратификациялаган. Ага ылайык, өкмөт мүмкүнчүлүгү чектелген жарандар үчүн байланыш тоскоолдуктарын жоюуга жардам берген жеткиликтүү маалыматтык инфраструктураны түзүшү керек. Мамлекетибиз өзүнө алган милдеттенмелерди аткарып жатканына кубанычтамын. Бүгүнкү уникалдуу санарип өнүмдүн бет ачары мунун түздөн-түз далили болуп саналат.
Которгон: Илгиз
Жамалбеков
