К.Токаев Казакстандыктарды борбор шаар күнү менен куттуктады

Касым-Жомарт Токаев казакстандыктарды борбор шаар күнү менен куттуктады. Президент бул майрамдын өзгөчө маанисин белгиледи - быйыл бул дата символикалуу  түрдө Домбра күнүнө туш келди. Музыкалык аспап - Улуу талаанын миң жылдык уникалдуу маданий мурасынын байыркы символу, ал эми Астана - өлкөнүн заманбап келечекке умтулуусунун көрүнүктүү көрүнүшү. Касым-Жомарт Токаев ошондой эле борбор шаар заманбап Казакстандын брендине айланганын, глобалдык диалог тынчтык орнотуу демилгелери үчүн кадыр-барктуу эл аралык аянтча статусуна ээ болгонун баса белгиледи. 

Касым-Жомарт Токаев, Казакстан Республикасынын Президенти: 

- Бүгүн борбор шаар – бул биздин мамлекетибиздин коомдук, саясий жана ишкердик турмушунун чордону. Анда тагдыр чечүүчү чечимдер кабыл алынып, укмуштуудай идеялар жана тайманбас кыялдар ишке ашат. Бул жерде билим жана эмгек культу бекемделип, жалпы улуттук биримдик жана ынтымак чыңдалат. Борбор калаа дайыма түп-тамырынан бери өзгөрүүлөрдүн жана масштабдуу реформалардын эпицентри болуп келген. Ишенем, адилеттүү, таза жана күчтүү Казакстанды куруу жолунда ал өзүнүн флагмандык позициясын сактап, ар тараптуу өзгөрүүлөрдүн башында турат. Сүйүктүү шаарыбыз гүлдөп өнүп, андан да көрктүү боло берсин! Бардык мекендештериме ден соолук жана бакубатчылык каалайм! 

Мамлекет башчысы домбранын күнү менен куттуктады. Касым-Жомарт Токаев өзүнүн Х социалдык тармагындагы баракчасына домбра – элибиздин жаны жана байлыгы экенин жазды. «Чыныгы казак –  казак эмес, чыныгы казак – домбра». Бул музыкалык аспап өсүп келе жаткан муундун арасында барган сайын популярдуу болуп баратат. 

Касым-Жомарт Токаев, Казакстан Республикасынын Президенти: 

- Жаштар биздин түпкү маданиятыбызга терең сүңгүп кирип, элдик каада-салттарды ыйык тутушат. Бул, албетте, кубандырбай койбойт, анткени улуу бабаларыбыздын чыгармачылык мурасына болгон мындай аяр мамилеси патриотизмдин ажырагыс бөлүгү болуп калды. Өз Мекенине болгон чыныгы сүйүү – мамлекетибиздин пайдубалы. Казакстандын жаштары муну түшүнүп, колдоп жатканы абдан жакшы. Мамлекет маданият тармагын ар тараптан колдоону улантат. Салттуу искусство чеберлери жогорку наамдарга ээ болушту: Кайрат Байбосынов – «Казакстандын Эмгек Ери», Айгүл Үлкөнбаева, Айгүл Косанова – «Казакстандын эл артисти». Биздин ыйык домбрабызды дүйнөгө тааныткандардын баарына ыраазычылык билдирем. 

Которгон: Назира Бегалиева