Касым-Жомарт Токаев жана Режеп Тайип Эрдоган казак-түрк
бизнес форумуна катышышты. Мамлекет башчысы Казакстандын түрк компанияларын ар
тараптуу колдоосун баса белгиледи. Учурда өлкөдө түрк капиталы менен 4000ге
жакын ишкана ийгиликтүү иштеп жатат. Токаев инвестицияларды көбөйтүү үчүн өнөр
жай кызматташтыгы абдан маанилүү экенин белгиледи. Бул жерде Казакстан менен
Түркиянын ортосундагы өкмөттөр аралык комиссия өзгөчө роль ойношу керек. Жалпысынан
өлкөдө жагымдуу бизнес чөйрөсүн түзүү боюнча кеңири иштер жүрүп жатат.
Президенттин алдында Чет элдик инвесторлор кеңеши түзүлдү. Атайын инвестициялык
штаб иштеп жатат. Бирдиктүү терезе принциби боюнча иштеген Улуттук платформа
ишке киргизилди. Андан тышкары, инвесторлорго «Алтын виза» программасы боюнча
салык жана иммиграциялык жеңилдиктер берилет. Астана эл аралык каржы борбору
олуттуу бизнес мүмкүнчүлүктөрүн сунуштайт.
Касым-Жомарт Токаев, Казакстан
Республикасынын Президенти:
– Астана каржы борбору менен
Borsa Istanbul биржасынын ортосундагы өнөктөштүк бекемделип жатат. Биз түрк
бизнеси менен байланыштарыбызды кеңейтүүгө кызыкдарбыз. Биз түшүнгөндөй, Режеп
Тайип Эрдогандын демилгеси менен улуттук экономикага ири көлөмдөгү инвестицияларды
тартуу үчүн бир катар конкреттүү чаралар ишке ашырылат. Ак ниет ишкерлерге бир
катар жөнгө салуу жана салык жеңилдиктери берилет. Бул демилгени анын эң
актуалдуу аспектилерин натыйжалуу ишке ашыруу үчүн сөзсүз изилдейбиз.
Президенттин айтымында, казак-түрк бизнес чөйрөлөрү
7,5 миллиард доллардан ашык суммадагы 140тан ашык долбоорду ишке ашырышты.
Кызматташтыктын дарамети
жогору бойдон калууда. Өнөктөштүктү күчөтүүнүн артыкчылыктуу багыттарына айыл
чарбасы, медицина, фармацевтика, транспорт жана логистика кириши мүмкүн. Бул
жаатта Ортоңку коридор деп да аталган Транскаспий коридору чоң роль ойнойт.
Акыркы жылдары маршрут боюнча жүк ташуу көлөмү беш эседен ашык, ал эми
контейнердик ташуулар өткөн жылы 36% га өстү.
Касым-Жомарт Токаев, Казакстан Республикасынын Президенти:
– Жалпысынан алганда, Ортоңку
коридордун мүмкүнчүлүктөрүн кеңейтүү биздин өлкөлөрдүн узак мөөнөттүү
кызыкчылыктарына жооп берет. Бул жагынан алганда, биз логистикалык
процедураларды электрондук түрдө иштетүүгө мүмкүндүк берүүчү, ошону менен
процесстин максималдуу ачык-айкындуулугун камсыз кылуучу жана административдик
чыгымдарды минималдаштыруучу электрондук уруксат долбоорун биргелешип ишке
ашырууну сунуштадык. Мен Ортоңку коридор долбоорун Трамптын Эл аралык тынчтык
жана гүлдөп-өнүгүү үчүн жолу (TRIPP) демилгеси менен интеграциялоо маанилүү деп
эсептейм.
Мындан тышкары, өлкө түрк компаниялары менен жасалма интеллект, финтех, киберкоопсуздук жана онлайн кызматтар жаатында биргелешкен долбоорлорду иштеп чыгууга даяр. Түркиянын Президенти казак жана түрк ишкерлеринин салымынын аркасында жетишилген эки тараптуу экономикалык мамилелердин жогорку деңгээлде өнүгүшүн белгиледи. Ал өткөн жылы Казакстан Түркиянын түрк дүйнөсүндөгү эң ири соода-экономикалык өнөктөшүнө айланганын баса белгиледи. Эми өлкөлөр соода жүгүртүүнү 15 миллиард долларга чейин жеткирүүнү көздөп жатышат.
Которгон: Илгиз Жамалбеков
Oкшош жаңылыктар
