Алматылык сүрөтчү этникалык элементтер менен кооздолгон «реалдуу» сүрөттөрдү тартат. Салттуу оймо-чиймелери бар портреттер чыгармага улуттук өзгөчөлүк берет. Динара Осман айрыкча аялдардын образын тартуунун чебери. Бул анын күнүмдүк шыктанычы болгон сүйүктүү темасы. Улуттук кийимдер менен зер буюмдары бар сулуу кыздардын образы — анын полотнолорунун башкы каармандары. Мындай чыгармалардын бири — «Буурчактагы ханыша». Аны автор бир нече күндүн ичинде даярдаган. Сүрөтчү өзгөчө көзгө маани берет, аны кылдаттык менен тартат. Динара көздү адамдын жан дүйнөсүнүн чагылышы деп эсептейт.
Динара Осман, сүрөтчү:
- Сүрөт тарта баштаганда шыктанасың, анан убакытты унутуп, сүрөт тартууну улантасың. Мен казактын бай этномаданиятын көрсөткүм келет, анын чындыгында айтылчу көп нерсеси бар. Менин эмгектеримди мекендештер Казакстанда гана эмес, чет өлкөлөрдө да сатып алып жатканы мага кубаныч тартуулайт. Бул өнөрүбүздү сактоого жана дүйнөгө көрсөтүүгө жардам берет. Өлкө тууралуу көп нерсе айтууга болот — талаалар, тоолор, кооз жаратылыш, ар кандай мезгилдер — булардын баары мага дем берет.
Алматылык сүрөтчү өз ишинде ар кандай ыкмаларды колдонот. Анын ар бир сүрөтү уникалдуу. Жыйырма жылдын ичинде ал 500гө жакын сүрөт тарткан. Динара Осман өзүнүн эмгектеринин көбүн социалдык тармактагы баракчасына жарыялайт. Окурмандары ага ар бир сүрөттүн аталышын тандоодо жардам беришет. Сүрөтчүнүн уулдары да апасы менен сүрөт тартканды жакшы көрүшөт.
Даниял Рүстембеков, Динара Османдын уулу:
- Мен кээде апам менен бирге сүрөт тартам. Уйкудан ойгонуп, конок бөлмөсүнө барсам, түнү бою тартылган даяр сүрөт турат, мага бул көрүнүш абдан жагат.
Динара Османдын эмгектери Нью-Йорк, Лос-Анджелес жана Дубайдагы жеке коллекцияларда сакталат. Алматылык сүрөтчүнүн кыялы — өз чыгармаларын Париждин Лувр музейинде көрүү.
Oкшош жаңылыктар
