Жазғы сурдлимпиада жүлдегерлері мемлекеттік наградалармен марапатталды

Бүгін Астанада XXV жазғы Сурдлимпиада ойындарына қатысқан отандық спортшылар марапатталды. Олжас Бектенов Президент атынан байрақты дода жүлдегерлеріне мемлекеттік наградалар табыс етті. Аталған төрткүл дүние ойындарына 81 мемлекеттен 3 мыңға жуық спортшы қатысты. Қазақстанның Ұлттық құрамасы жаһандық деңгейдегі жарыста жалпы командалық есепте 9-шы орынды иеленді. Отандық спортшылар Токиодағы жазғы Сурдлимпиада ойындарында сегіз спорт түрінен ел намысын қорғап, 8 алтын, 4 күміс және 13 қола – барлығы 25 медаль жеңіп алды. Премьер-министр Олжас Бектенов спортшыларды қолдау Үкімет жұмысының басым бағыттарының бірі екенін атап өтті. Ұлттық құрамаға, оның мамандары мен бапкерлер құрамына жеңіске жету жолында табандылық пен ерік-жігердің үлгісін көрсеткен үйлесімді және нәтижелі жұмыстары үшін алғысын білдірді.

Олжас Бектенов, ҚР Премьер-министрі:

- Сурдо дзюдо спортшыларының жетістіктерін ерекше атап өткім келеді. Олардың жоғары деңгейде өнер көрсетуі Қазақстанға 11 медальалып келді және Сурдлимпиада ойындарының жарқын жетістіктерінің бірі болды. Бұл нәтижелер спортшыларды спорттық сын-қатерлермен ойдағыдай күресуге қабілеттілігін көрсетеді. Үкімет өз кезегінде кәсіби және бұқаралық спортты дамыту, спортшыларды қолдау бойынша жұмыстар жүргізуде. 

Веб-редактор: Айнұр Досан