Үш сала Қазақстанның ІЖӨ 70% астамын қамтамасыз етіп отыр

Биыл Қазақстанның ішкі жалпы өнім өсімінің 70% астамын өнеркәсіп, сауда және көлік салалары қамтамасыз етіп отыр. Негізгі капиталға салынған инвестиция 18,5 трлн теңгені құрап, жеке инвестициялардың көлемі 10% жуық өскен. Пезидент Қасым-Жомарт Тоқаевқа Премьер-министр еліміздің биылғы әлеуметтік-экономикалық дамуының алдын ала қорытындылары туралы есеп берді. Олжас Бектеновтың дерегінше, қаңтар-қараша айлары аралығында көлік қызметі 20%, құрылыс 15% шамасында және сауда 9% жуық, сондай-ақ ауыл шаруашылығы мен  өңдеу өнеркәсібі 6% төңірегінде ұлғайған. Сонымен қатар, Мемлекет басшысына макроэкономикалық тұрақтандыру бойынша 2026-2028 жылдарға арналған бағдарламаның жүзеге асуы, бес өткізу бекетін жаңғырту жұмыстары аяқталғаны, Қазақстандық тауар өндірушілердің реестрі іске қосылғаны, сондай-ақ шағын бизнесті қолдауға арналған «Іскер аймақ» бірыңғай бағдарламасы қабылданғаны жөнінде мәлімет берілді. Сондай-ақ, Үкімет басшысы ауыл шаруашылығы өнімдерін өңдеу мен экспортқа ден қоя отырып, егіс алқаптарының көлемін сақтау және оны ұлғайту көзделгеніне тоқталды. Қасым-Жомарт Тоқаев еліміздің тұрақты дамуын қамтамасыз ету бағытындағы жұмысты жалғастыруды тапсырды. 

Веб-редактор: Айнұр Досан