Н.Тілендиевтің 100 жылдығына орай ЮНЕСКО-да халық музыкалық аспаптарының көрмесі ашылды

Әйгілі күйші композитор Нұрғиса Тілендиевтің 100 жылдығына орай Парижде ЮНЕСКО-ның штаб-пәтерінде көрме ашылды. Айта кетейік, қазақ саз өнері сайыпқыранының мерейтойы халықаралық ұйымның атаулы күндер тізіміне енгізілген. Көрмеге Алматы музейлері бірлестігінің қорынан 60-тан астам экспонат қойылды. Олардың арасында сирек қолжазбалар, автордың жеке заттары мен нота жазбалары бар. Сондай-ақ, композитор Ахмет Жұбанов сыйға тартқан аңызға айналған «Дариға домбыра» да ұсынылған. Бес бөлімнен құралған көрме Нұрғиса Тілендиевтің өмір жолын баяндайды. Жеке блокқа қазақ және түркі халықтарының музыкалық аспаптары қойылған. Жоба еліміздің бай мәдени мұрасын халықаралық аренада насихаттауға бағытталған.

Ақтоты Райымқұлова, Халықаралық түркі мәдениеті мен мұрасы қорының президенті:

- Ол кісінің өнері біздің заманауи композиторлық мектепке де, орындаушылық мектепке де үлкен өзінің септігін тигізді. Және үлкен бүгінгі кезде Нұрғиса ағамыз болмаса біздің музыкамыз басқаша болар еді. Қазір бұл дүниежүзі таңқалатын, керемет үндермен өзін баурап алатын композициялар және оркестрлік шығармалар әрине біздің қазақ музыкасының мақтанышы.

Веб-редактор: Айнұр Досан