Қазақстанда жол ақауларын жасанды интеллект анықтайды

Қазақстанда «Екатеринбург - Алматы» автодәлізінің 30 шақырымынан астамы күрделі жөндеуден өтеді. Респуликалық маңызы бар жолға талдау жасаған жасанды интеллект аталған учаскенің талапқа сай еместігін анықтаған. Қазір сала мамандары 4 арнайы камера және бірнеше ақылды құрылғымен жабдықталған жылжымалы зертхананың көмегімен асфальт жабындысының беріктігін, тегістігін тексеруде. Айтуларынша цифрлық жүйе жұмысты әлдеқайда жеңілдеткен. Мәселен бұрын 100 шақырымның дерегін өңдеуге шамамен 4 тәулік кететін. Ал қазір ол небәрі 3-4 сағатта дайын болады.

Жолдыбай Тентеков, Ұлттық сапа орталығы филиалының директоры:

- Тапсырыс беруші бұл учаскеге ағымдағы жөндеу жүргізбек болған екен. Алайда жылжымалы жол зертханасы диагностика жасаған соң, жасанды интеллект оның сапасы өте нашар екенін айқындап берді. Сондықтан да тапсырыс беруші бұл аумақта күрделі жөндеу жасау туралы шешім қабылдады.  

Жол жабынының ақауларын анықтайтын тағы бір қазақстандық өнертабыс. Ол үшін Jolscan жобасының компьютерлік көру технологиясы жедел жәрдем мен патрульдік көліктердің регистраторына түскен  бейнелерді пайдаланады. Барлық жиналған ақпаратты жүйе автоматты түрде өңдеп, тіркелген олқылықтарды қаланың коммуналдық қызметтеріне жібереді.  Бүгінде оның көмегімен жөндеуді талап ететін 500 жуық учаске тіркелген. Қазіргі таңда олардың жартысынан көбі қалпына келтірілді.

Рүстем Қадыров, Жобаны әзірлеуші:

- Жедел жәрдемнің көмегімен жолдың жабынын қадағалаймыз. Нақтырақ айтсақ ондағы регистраторға түскен бейне ағынын саралаймыз. Жасанды интеллект моделі жолдардағы шұңқырларды анықтайды. Содан кейін талапқа сай келмейтін жерлер интерактивті картаға шығарылады. Шұңқырдың нақты орналасқан жерін, тіркелген күнді белгілеп саламыз. Іс жүзінде бұрын қолмен жиналатын ақпаратты қазір озық үлгідегі ақылды жүйе атқарады. 

Веб-редактор: Айнұр Досан