Қазақстан Президенті Бразилияның Сыртқы істер министрін қабылдады

Қазақстан Президенті Бразилияның Сыртқы істер министрі Мауро Виейраны қабылдады. Тараптар кездесу барысында энергетика, ауыл шаруашылығы, тау-кен металлургия кешені, инновация және жасанды интеллект салаларындағы ынтымақтастықты тереңдету әлеуетін талқылады. Қасым-Жомарт Тоқаев бразилиялық делегацияның сапары екіжақты қарым-қатынастарды нығайтуға тың серпін беретініне сенім білдірді. Мемлекет басшысы Бразилия Қазақстанның Латын Америкасындағы басты серіктестерінің бірі екенін айтты. Сондай-ақ ол Президент Лула да Сильваға ізгі сәлемі мен ыстық ықыласын жолдап, елімізге сапармен келуге шақырды. Әңгімелесу барысында халықаралық күн тәртібіне назар аударылды. Қасым-Жомарт Тоқаев Қазақстанның атом қуатын МАГАТЭ бақылауымен тек бейбіт мақсатта пайдалануға бейіл екенін растады. Кездесуде еліміз ядролық қаруды таратпау бойынша халықаралық аренада зор сенімге ие екені айтылды.

Веб-редактор: Нұрбек Балгүл Қайрошқызы