Қазақстан мен Гвинея-Бисау серіктестікті кеңейтуге ниетті

Бүгін Ақордада Гвинея-Бисау Президентін салтанатты түрде қарсы алды. Қазақстанға ресми сапармен Умару Сисоку Эмбало келді. Қасым-Жомарт Тоқаев шағын құрамдағы келіссөздерде, Гвинея-Бисау біздің еліміздің Африка құрлығындағы маңызды серіктесі болып табылатынын атап өтті. Сонымен қатар, Президент Қазақстан екіжақты қарым-қатынастарды нығайтуға мүдделі екенін растады. Қос тараптың халықаралық өзекті мәселелерге көзқарасы ұқсас. Біздің республика көпжақты құрылымдар, соның ішінде БҰҰ аясында табысты ықпалдастық орнатты. Сондай-ақ, Ислам ынтымақтастығы ұйымындағы өзара іс-қимылды кеңейтуге дайын. Өз кезегінде Умару Сисоку Эмбало қонақжайлық көрсеткені үшін Қасым-Жомарт Тоқаев пен Қазақстан халқына алғыс айтты.

Ал, кездесуден кейін Президенттер ресми делегациялардың қатысуымен кеңейтілген форматта келіссөздер жүргізді. Қасым-Жомарт Тоқаев Гвинея-Бисау басшысының сапарын тарихи деп атап өтіп, бұл кездесу өзара тиімді серіктестікті одан әрі тереңдетуге негіз болады деді. Жоғары деңгейдегі осы кездесу екі ел арасындағы қарым-қатынастың жаңа кезеңіне жол ашады. Сондай-ақ, өткен жылы елдер арасында дипломатиялық қарым-қатынастың орнағанына 10 жыл толды. Ал БАҚ өкілдеріне арналған брифинг барысында Мемлекет басшылары келіссөздердің басты мәселелеріне тоқталды.

Қасым-Жомарт Тоқаев, Қазақстан Республикасының Президенті:

- Көлік-логистика саласының әлеуетін толық пайдалануға екі ел де мүдделі. Осы ретте Батыс Африкадағы Бисау порты мен Транскаспий көлік дәлізін ұштастыру жолдарын зерделеуге келістік. Әлемдегі геосаяси ахуал мен азық-түлік қауіпсіздігі мәселесі ушығып тұрған қазіргі кезде мұның мән-маңызы айрықша.

Тараптар ауыл шаруашылығы саласында да әлеуеттің зор екенін атап өтті. Еліміздің Гвинея-Бисауға дәнді дақылды экспорттауға мүмкіндігі мол. Қасым-Жомарт Тоқаев цифрлық қызметтер саласындағы байланыстарды кеңейтуді ұсынып, Африка елінің өкілдерін, келесі жылы Астана халықаралық форумына қатысуға шақырды. Сонымен қатар, Гвинея-Бисау жастарына қазақстандық жоғары оқу орындарында білім алуды ұсынды. Тараптар тау-кен өнеркәсібінде де өзара іс-қимылды арттыруды жоспарлап отыр.

Умару Сисоку Эмбало, Гвинея-Бисау Президенті:

- Елдерімізде табиғи ресурстарды барлау, білім беру салалары мен көмірсутегін экспорттау бойынша ықпалдастықты жандандыруға қажетті механизм бар. Сонымен қатар, сіздермен түрлі халықаралық алаңдарда қарым-қатынас жасап, көпқырлы байланысымызды ілгерілетуге мүдделіміз.

Келіссөздер қорытындысы бойынша президенттер Бірлескен мәлімдеме қабылдады. Ал, ресми делегациялардың мүшелері бірқатар құжаттарға қол қойды. Олардың ішінде ақпараттық-коммуникациялық технологиялар саласындағы ынтымақтастық туралы меморандум да бар.

Авторы: Әсел Күшенғалиева

Веб-редактор: Әсел Бақытқызы