Қазақстан Президенті мен Ислам даму банкінің басшысы Қоршаған ортаны қорғау саласы және «жасыл» энергетикаға көшу шаралары бойынша бірлескен жобаларға баса назар аударды. Мемлекет басшысы Қасым-Жомарт Тоқаев жаһандық экологиялық сын-қатерлер мен еліміздің орнықты дамуға ұмтылысы жағдайында бұл бастамалардың маңызы зор екенін атап өтті. Келіссөздер қорытындысы бойынша су ресурстарын дамытуға бағытталған 3,5 млн грантты қоса алғанда, АҚШ валютасында 1 млрд 153 млн-ға келісімге қол қойылды. Айта кетейік, бұл – банктің 51 жылдық тарихындағы ең көлемді қаржыландыру жобасы.
Нұрлан Байбазаров, ҚР Премьер-Министрінің орынбасары-Ұлттық экономика министрі:
- Біз шынымен де осы саммитте Ислам даму банкінің ең ірі инвестицияларын тартамыз. Бұл бізге таяу үш жылда еліміз бойынша 3 жарым мыңнан астам жаңа арналар салуға мүмкіндік береді. Жоба еліміздің 9 өңірін қамтиды. Суару арналары мен ирригациялық жүйелерден басқа біз 9 жаңа су қоймасын жаңғыртып, қайта салатын боламыз.
ИКАО басшысы Қазақстанның азаматтық авиация саласындағы табысын жоғары бағалады. Қасым-Жомарт Тоқаевпен кездесуде Сальваторе Шаккитано елімізбен әуе тасымалының қауіпсіздігі және тұрақтылығын қамтамасыз ету мақсатындағы серіктестікті одан әрі нығайтуға қолдау көрсетуге дайын екенін мәлімдеді. Ол сондай-ақ Қазақстанның Ұйым жанынан тұрақты өкілдігін ашқаны үшін ризашылығын білдірді.
Сальваторе Шаккитано, Халықаралық
азаматтық авиация ұйымының президенті:
- Қазір біз бірлескен жоба бойынша жұмыс істеп жатырмыз. Қазақстанның авиация саласын дамыту жөнінде бас жоспарымыз бар. Бір жағынан ИКАО-ның, екінші жағынан Қазақстанның 2050 жылға қарай азаматтық авиацияны декарбонизациялау бойынша ұстанымы бар. Елдің осы бағытта белсенді жұмыс істеп жатқанын білеміз. 2030 жылға қарай көміртек үлесін 5% дейін азайту туралы қысқамерзімді мақсатымыз да бар. Ол үшін экологиялық таза әуе жанар-жағармайын қолдануымыз керек. Қазақстанның бұл бағытты қолдайтынын жақсы білеміз.
Жеңіс Ермұқанов
Веб-редактор: Айдана Нагиева
Сондай-ақ
