Биыл аты аңызға айналған әнші Бибігүл Төлегенова 95 жасқа келді. Әйгілі күміс
көмейдің мерейтойы қарсаңында Қазақстан астанасында үлкен концерт өтті. «Астана
Опера» театрында белгілі өнер қайраткерлері, балет әртістері және жетекші
отандық ұжымдары белгілі опера орындаушысын құттықтады.
Киелі сахна төрінен 70 жылдан астам уақыт бойы Бибігүл Төлегенованың есімі
жоғары кәсібилік, орындаудың тазалығы және ұлттық музыка өнеріне деген
сүйіспеншілікпен ұштастырылған. «Қазақ бұлбұлының» репертуары сантүрлі. Оның шығармашылық
қорында халық әндері, белгілі отандық сазгерлердің туындылары, романстар,
опералардан ариялар және батыс еуропалық музыка майталмандарының әйгілі
еңбектерінен орындаулар бар. Атап айтсақ, халық аузында жүрген «Гауһар тас»,
«Жиырма бес», «Қос қарлығаш», «Еске алу», «Бұлбұл» және тағы басқа танымал
әндері бар. Бибігүл Төлегенова өнердегі жолында отызға тарта марапатқа ие
болды. Ол ХХ ғасырдың көрнекті жиырма әйелінің бірі ретінде ЮНЕСКО тізіміне
енгізілген.
Бибігүл Төлегенова, опера әншісі, Қазақ АҚСР және КСРО халық әртісі:
- Қашанда болса әуелі өзіңнің еліңді, өзіңнің мәдениетіңді түсіну, білу
керек. Содан соң басқа классикаларды таныстырасың. Қазақтың халық әндері
болсын, қазақтың мәдениеті, опералары болсын әуелі мен солардың барлығын өзіме
ән емес өлең етіп айтамын. Алдымен оны өлең ретінде түсініп, соны жаттап
сөйлеймін. Содан кейін ғана оны әнге саламын. Өйткені, әнге салу үшін әрине әр
әннің мәнін, мағынасын түсініп алу керек.
Жеңіс Ермұқанов
