Астанада БҰҰ 80 жылдығы атап өтілді

Қазақстанда БҰҰ 80 жылдығына арналған пошта маркасы шығарылды. Оның таныстырылымы Астанада өтті. Мерейтойлық марканы отандық суретшілер мен халықаралық құрылымның мамандары әзірлеген. Олардың айтуынша ол Ұйымның басты мақсаттары - бейбітшілік пен қауіпсіздікті қолдауды, сондай-ақ халықаралық ынтымақтастықты дамытуды білдіреді. Онда қазақтың ою-өрнектері де бейнеленген.

Еске сала кетейік, Қазақстан осыдан 33 жыл бұрын БҰҰ мүшесі атанды. Осы уақыт ішінде еліміз Ұйыммен табысты әріптестік орнатып келеді. Мемлекет басшысы Қазақстан БҰҰ Жарғысын, сондай-ақ тұрақты дамудың мақсаттары мен қағидаттарын әрдайым ұстанатынын айтты. БҰҰ Бас Ассамблеясының 80-ші мерейтойлық сессиясында Қасым-Жомарт Тоқаев құрылымның жаһандық сын-қатерлерге қарсы тұрудағы маңыздылығын тағы да атап өтті. БҰҰ-ның Қазақстандағы тұрақты үйлестірушісі Саранго Раднарагча орнықты дамуға және серіктестік деңгейінің жоғары болуына қол жеткізу үшін бірлескен күш-жігердің маңызын тілге тиек етті. Бүгінде еліміздің аумағында БҰҰ-ның 27 агенттігі мен мекемесі жұмыс істейді. Бұдан бөлек, Алматыда БҰҰ-ның Орталық Азия мен Ауғанстанға арналған орнықты даму мақсаттары жөніндегі өңірлік орталығы ашылған болатын.

Скендер Сыла, Қазақстанның ДДСҰ елдік кеңсесінің басшысы:

- Қазақстанмен ынтымақтастығымыз өте жақсы дамып келеді. Елдеріңіз көптеген бастамаларда көшбасшы. Қазақстан Дүниежүзілік денсаулық сақтау ұйымымен алғашқы медициналық-санитарлық көмек саласында тығыз әріптестік орнатты. Басқа да бірлескен жобалар бар. Арал теңізі бойынша да ортақ жоба қолға алынды. Біз оны таяу жылдары іске асыруды жоспарлап отырмыз. Оған, сондай-ақ Өзбекстан мен Орталық Азияның басқа да елдері қатысады.

Іс-шара «Жаһандық мақсаттар үшін музыка» концертімен аяқталды. Онда отандық және шетелдік сазгерлердің дәстүрлі және заманауи шығармалары орындалды. 

Веб-редактор: Нұрбек Балгүл Қайрошқызы