Ҳар кимнинг дидига мос совғалар! Йилнинг энг серзаҳмат ойи якунига етаркан, ҳар бир қозоғистонликни ташвишга соладиган муаммо пайдо бўлади: Янги йилга қандай совға олиш керак? Кимдир фақат энг яқин одамларига ҳадялар олади, бошқалар ҳамкасблари ва дўстларини ҳам шодлантиришга интилади! Жорий йилда нима долзарб? Энг яхши ечим – совғани олиши лозим бўлган одам байрамда нима кутаётганини англаб етиш. Бунинг имконияти йўқ бўлса – трендларга қараймиз.
Бундай интерьер предметлари – жорий йилнинг бош тренди. Бетон буюмларни Асқар Қасимбеков ўз қўллари билан ясайди. Шуни ҳам айтиш лозимки, бир нусхада яратилган буюмлар пойтахт аҳли эътиборини қозонган.
Асқар Қасимбеков, декоратив бетон буюмлар устаси:
- Бу кўпроқ лофт услубида. Баъзилари кулранг, бошқалари буюртмачи истагига кўра, интерьерга мослаб яратилади. Янги, тераццо услубида тайёрланганлари ҳам бор. У кўпроқ итальянча, жуда қизиқарли. Ҳаммага тўғри келиши мумкин. Мижозга ёқмаган ҳолат бўлмаган.
Оддий сувенирлар билан лол қолдиролмайсиз. Қозоғистонликлар ҳозир «креативлик»ка эътибор беради. Масалан, тай массажи сертификати, суратни чиқариб берувчи фотоаппарат. Лекин саволларимизга жавоб берганларнинг кўпчилиги асосийси совға эмас, кўрсатилган эътибор эканлигини таъкидламоқда. Лекин қимматбаҳо совға ҳам ортиқча эмас!
Катталар кундаликда фойдали нарса ҳақида ўйлаётганида болалар мўъжиза кутади ва Қорбобо совға келтиришига ишонади. Энг яхши янги йил совғаларини арча остидан топиб олиш у қадар осонмас. Муҳими, атрофингизда сиз учун мўъжиза яратишга тайёр, сизни севган одамлар кўпроқ бўлсин!
Абдумалик Сарманов таржимаси
