Ашхободда Бирлашган Миллатлар Ташкилотининг 80 йиллиги ҳамда Туркманистон нейтралитетининг 30 йиллигига бағишланган халқаро анжуман бўлиб ўтди. Унинг иштирокчилари БМТнинг тинчлик, ишонч ва барқарор тараққиётни илгари суришдаги роли, шунингдек, Марказий Осиё давлатларининг глобал ташаббусларни амалга оширишдаги ҳиссаси борасида сўз юритди. Туркманистон Ташқи ишлар вазири Рашид Мередов таъкидлаганидек, республика Ташкилот билан ҳамкорликни мунтазам равишда мустаҳкамлаб келяпти. Сўнгги 20 йил мобайнида мамлакатда қиймати 545 миллион доллардан зиёд бўлган 560 дан кўпроқ қўшма лойиҳа рўёбга чиқарилган. Ҳамкорликнинг асосий йўналишлари - соғлиқни сақлаш, таълим, экология ва иқтисодиёт. Хусусан, БМТ Тараққиёт дастури ва БССТ тиббий марказлар қурилиши, оналар соғлиғини яхшилаш ва силга қарши кураш дастурларини қўллаб-қувватлайди, ЮНИСЕФ эса болалар таълими ҳамда бола ҳуқуқлари муҳофазасини равнақ топтиради. Экология, иқлим ўзгаришлари ва табиатдан фойдаланиш соҳаларига алоҳида диққат қаратилган. Қолаверса, Туркманистонда БМТ билан ҳамкорликда Каспий тизимини қўриқлаш бўйича лойиҳани ишга туширилди.
Дмитрий Шлапаченко, БМТнинг Туркманистондаги доимий координатори:
– БМТ Туркманистонда ривожланаётгани бизни қувонтиради. Туркманистон ҳукумати билан ҳамкорлигимиз яхши йўлга қўйилгани мамнун қилади. Бу ҳамкорлик аллақачон стратегик тус олган. Шу боис, биз учун аҳамияти ортиб, кенгайиб бормоқда. Ҳукумат билан бўлиб ўтган стратегик кенгашда биргаликда ҳал этиладиган кўплаб масалалар белгилаб олинди. Шундай экан, ўсиш давом этади.
Анжуман якунларига кўра, иштирокчиларнинг Туркманистон президентига мурожаати қабул қилинди. Шундан сўнг мамлакат ҳукумати ва БМТ ўртасида барқарор тараққиёт бўйича яқин беш йилга мўлжалланган, ўзаро шерикликнинг стратегик мақсадлари белгиланган Асосий дастурнинг тантанали имзоланиши бўлиб ўтди.
Абдумалик Сарманов таржимаси
Ўхшаш янгиликлар
