Қозоғистонда «Migration.enbek.kz» портали яратилди. Бундан мақсад – юртимизга келадиган чет эл фуқароларини ҳисобга олишнинг ягона ахборот тизимини йўлга қўйиш. «Ягона дарча» тамойили асосида ишлайдиган тизим босқичма-босқич жорий этилмоқда. Соҳа мутахассислари маълум қилишича, пилот лойиҳага ўтган йили 15 та хизмат киритилган бўлса, жорий йилда яна 3 та хизматни қўшиш режа қилинган. Масалан, ушбу йилдан эътиборан, ихтиёрий миграция учун кўрсатиладиган давлат кўмаги чоралари электрон форматга ўтказилди. Ҳужжатларни рақамли шаклда расмийлаштириш туфайли Қозоғистон паспортини бериш 6 ойдан 30 кунгача қисқартилди. Ташқи миграциянинг умумий кўрсаткичи яхшиланмоқда. Мисол учун, ўтган йили 41 мингга яқин чет эл фуқароси Қозоғистонга кўчиб келган, бошқа давлатга кетган қозоғистонликлар сони 11 мингдан ошган. Мамлакатга вақтинча келган хорижликлар сони ҳам кўпайган.
Аслан Аталиқов, Қозоғистон Республикаси Ички ишлар вазирлиги Миграция хизмати қўмита бошлиғи:
- Мамлакатимизга келадиган хорижликлар учун инвестициявий ҳамда сайёҳлик жозибадорликни ошириш мақсадида зарур чора-тадбирлар қабул қилинди. Бугунги кунда 87 та давлат фуқаролари юртимизга визасиз кира олади. 109 та давлат фуқаролари электрон виза расмийлаштириши мумкин. Кейинги йилларда мамлакатимизга келадиган чет элликлар сони ортиб боряпти. Ўтган йили 15 миллиондан ошиқ чет эллик келиб-кетган. Бу, олдинги йил билан солиштирганда, 1 миллионга кўп. Жорий йилда Қозоғистонга 2,8 миллион чет эллик киргани ҳисобга олинган.
Абдумалик Сарманов таржимаси
Ўхшаш янгиликлар
