Казак адабиятынын жазуучусу Мухтар Ауэзовдун 1960-жылы Америкага жасаган сапары тууралуу жазган күндөлүгү биринчи жолу казак жана англис тилдеринде жарык көрдү. АКШнын Алматыдагы башкы консулдугунда жазуучунун “Америка таасирлери” аттуу китебинин бет ачаары болду. Калемгердин Америкага сапары СССР менен АКШ өкмөтүнүн ортосундагы «Маданий, техникалык жана билим берүү жагынан байланыштар» тууралуу келишимдин натыйжасы болгон.
Кэролайн Сэвидж, Алматыдагы АКШнын башкы консулу:
- Китепти абдан кызыгуу менен окудум. Ал эки өлкөнүн тарыхындагы эң кызыктуу мезгилдер тууралуу таасир калтырды. Мындан 60 жылдан ашык убакыт мурда АКШ менен Советтер Союзу эки өлкө ортосунда маданий байланыштарды түзүү жолу менен өз ара түшүнүшүүгө жетишүү жөнүндө макулдашышкан. Мухтар Ауэзовдун мындай маданий алакалардын биринчи делегациясынын курамында болушу чоң бакыт - деп эсептейм.
Жазуучу Американын ар кыл тармактардагы жетишкендиктерин, жаратылышынын кооздугун, америкалыктардын жашоо образын кагаз бетине түшүргөн. Китептин бет ачаарында Мухтар Ауэзовдун саякатта жазгандарынан үзүндүлөр окулду.
Дияр Конаев, Ауэзов музей-үйүнүн мүдүрү;
- Мухтар Ауэзов Американын эң ири шаарларында болду. Ал Вашингтондо, Нью-Йоркто, Бостондо, Фениксте, Аризона шаттарын кыдырган. Ал тургай Дисней Лендге барып, Голливудда болуп, университеттерде, мектептерде көптөгөн жолугушууларды өткөргөн, ошондой эле Вашингтондогу Конгресс китепканасында болуп, америкалык жазуучулар менен көрүшкөн.
Казак жана англис тилдеринде жарык көргөн “Америка таасирлери” китебин “Kitap.kz” платформасынан тогуздун айына чейин акысыз окууга болот.
Которгон: Илгиз Жамалбеков
