Касым хандын жубайы Айшанын Франциядан табылган кол жазмасынын көчүрмөсү Казакстанда басылып чыкты. Баалуу илимий экспонат XVI кылымда түрк тилинде, атап айтканда кыпчак диалектисинде жазылган. Кол жазма жети бөлүмдөн турат. Ар бир бөлүм исламдын ыйык каармандарына байланыштуу окуяларга негизделген. Улуттук кол жазмалар жана сейрек китептер борборунун адистеринин айтымында, китепти түптөө 2 жумага созулган. Көчүрмөнүн айрым барактары бириктирилип, пахта жиптин жардамы менен бүтүндөй тигилген. Ошондой эле, атайын батист кездеме менен капталып, картон кагаз жана жашыл түстүү табигый булгаары колдонулган.
Алмат Абсалыков, кол жазмалар
жана сейрек китептер борборунун серепчиси:
-Бул китеп боюнча тарыхчы-чыгыш окумуштууларынын арасында эки көз караш бар. Кээ бир окумуштуулар, атап айтканда француз чыгыш таануучусу Эдгар Блаше бул китеп Казак хандыгынын башкаруучусу Касым хандын жубайы Айша айымга таандык деп эсептешет. Ал эми америкалык изилдөөчү Дэвид Дэвистин айтымында, кол жазма Мухаммед Шайбаниге же Губайдолла Ханга, башкача айтканда, алардын аялдарына таандык. Же болбосо Айша айым Мухаммед Шайбанинин аялы болгон. Бирок, биздин ата мекендик илимпоздорубуздун бул темада өз ой-пикирлери, аргументтери бар. Кол жазма, Казак хандыгынын башкаруучусу Касым хандын жубайы Айша айымдын жазмалары болушу толук мүмкүн.
Которгон: Илгиз Жамалбеков
Веб-редактор: Ализа Абай
Oкшош жаңылыктар
