Жыл башынан бери Нур-Султан шаарынын Экономикалык иликтөө башкармалыгы каржы пирамидаларына алданган жарандардын 2 миңден ашуун ишин сотко жөнөткөн. Эч кандай кыйынчылыксыз кошумча акча табууну каалагандардын саны мындан да көп - дейт борбор калаанын Экономикалык иликтөө башкармалыгынын өкүлү. Тимур Мукановдун айтымында, шылуундар өздөрүн портфелдик инвестиция жана финансылык кеңештерди сунуштаган эл аралык каржы-аналитикалык компания катары көрсөтүшкөн.
Тимур Муканов, каржы мониторинг агенттигинин Нур-Султан шаары боюнча экономикалык тергөө-текшерүү департаментинин өкүлү:
- Каржылык пирамидаларга байланыштуу маалыматтарга караганда, азыркы учурда 1000ден көп аманатчынын ишине байланыштуу тергөө иштери жүргүзүлүүдө. Бүгүнкү күнгө чейин акча салып, убада кылынган кирешесин албай, алданып калгандардан ар кандай арыздар түшүп жатат. Белгилей кетсек, негизинен каржы пирамидалары Казакстандын сыртынан, мисалы, Орусиядан же башка өлкөлөрдөн келет.
Нур-Султан шаарынын тургуну Гүлжан Бухарова шылуундарга алданып, 35 миң АКШ долларын жоготкон. Оңой акчанын булагын тапканына ишенип, бул ишке жакындарын да аралаштырган.
Гүлжан Бухарова, Нур-Султан шаарынын тургуну:
- Мени ал жакка бир таанышым чакырды. Аягында чоң суммадагы акча салдым. Убада боюнча күнүнө 1 пайыз түшүшү керек болчу. Бул криптовалюта - деп айтылган. Чынында, андайды көргөн жокмун. Ал эми акча салган сайт соңунда калп болуп чыкты.
Ошол эле учурда, шаардык экономикалык иликтөө башкармалыгынын кызматкерлери жарандарды каржы пирамидасын аныктай турган бир нече белгилерге көңүл бурууга чакырат.
Тимур Муканов, каржы мониторинг агенттигинин Нур-Султан шаары боюнча экономикалык тергөө-текшерүү департаментинин өкүлү:
- Бул тизмеде Каржы рыногун жөнгө салуу жана өнүктүрүү агенттиги тарабынан депозиттерди кабыл алууга лицензиянын жоктугу, уюмдун конкреттүү иш түрүнө ээ эместиги жана компаниянын финансылык абалы, акча каражаттарынын жүгүртүүсү, бизнес-жараяндарынын агымы жашыруун болот. Ошондой эле милдеттүү башкы төлөм акысын төлөө керек. Мунун баары каржы пирамидасы экендигинин далили. Жарандарга айтаарым, эгер бул тизмеде көрсөтүлгөн шарттарды байкасаңыздар, жолобоо абзел. Буга кошумча элдин каржылык сабаттуулугун жогорулатуу зарыл.
Белгилей кетсек, бүгүнкү күндө Каржылык мониторинг агенттиги каржы пирамидаларына каршы иштөө ыкмаларын өркүндөтүүдө. Өз кызматтарын жарнамалаган сайттарды бөгөттөө иштери системалуу түрдө жүргүзүлүп келет. Көрүлгөн чаралардын аркасында 3 миңден ашык сайт жабылды.
Которгон: Илгиз Жамалбеков
Веб-редактор: Admin
Oкшош жаңылыктар
