Казак акыны Гали Ормановдун латын арибинде жазылган күндөлүгү табылды. Лириктин 1939-1945-жылдары Жамбыл Жабаевдин адабий секретары болуп иштегени белгилүү. Бул ушул мезгилде жазылган 10го жакын күндөлүктүн биринчиси. Колдо болгон жалгыз экспонат адабий каармандын жубайы Айтбала Ормановада сакталып турат. Кийин колдон колго өтүп, ушул күнгө жеткен.
Аслан Шекеров, Нур-Султан ш. Г. Орманов атындагы №7 мектеп гимназиясынын тарых мугалими:
- Төмөнкү сүрөттө эл акыны, төкмөлүктүн алпы Жамбыл Жабаев менен бирге. Башкача айтканда, бул адамдын Жамбыл Жабаевге кандай тиешеси бар дей турган болсок, акын Жабаевдин ырларын кагаз бетине түшүрүп, тасма тарткан дал ушул Гали Орманов болгон.
Күндөлүктө Жамбылдын ырларынын оригиналдуу үлгүлөрү менен катар, анын ким менен жолуккандыгы, чогулуштарда талкууланган маселелер тууралуу жарыяланбаган маалыматтар камтылган. Ал калыбына келтирилгени менен, азыркы күнгө чейин адистер мазмунун толук изилдей элек.
Айдар Кырыкбайулы, Гали Ормановдун жээн-небереси:
- Адабиятчылар аны изилдеп чыккандан кийин барып китеп кылып чыгарабыз. Бул күндөлүктө Жамбыл атабызга байланыштуу, жалпы эле адабият тармагындагы көптөгөн сенсациялык жаңылыктар болот деп ойлойм. Андыктан, аны келечекте жаңыдан бекитилген алфавит боюнча басмакана болсун, Билим берүү жана илим министрлиги болсун, Маданият министрлиги болсун окуу китебине киргизүүгө даяр маалымат деп ойлойм.
Белгилей кетсек, жакында 1934-жылы эски латын арибинде жарык көргөн Гали Ормановдун «Олжабек» аттуу аңгемелер жыйнагы табылган. Анын жалгыз көчүрмөсү Якутия өлкөсүнүн Улуттук китепканасында сакталып турат. Өлкөдө болбогон баалуу дүйнө өз мекенине кайтты. Бул эмгекти жаңы латын алфавитине которуп, көп нускада басып чыгаруу мерчемделип жатат. Гали Орманов көптөгөн ыр жыйнактарынын, бир нече поэмалардын, аңгемелердин жана очерктердин автору. Анын чыгармалары бир катар чет тилдерге которулган. Гали Орманов орус жана чыгыш классиктерин да которгон. Толстойдун Анна Каренина романын казак тилине которгон жалгыз акын. Келерки жылы анын 115 жылдыгына карата эки томдук китеби кайрадан басылып чыгат.
Которгон: Илгиз Жамалбеков
