Қарағанды облысының Осакаров ауданынан көне қорым табылды. Бұл – соңғы онжылдықтардағы алғашқы құнды тарихи олжа. Ежелгі қорғанды ғалымдар жоспарлы дала жұмыстары кезінде анықтаған. Мамандардың назарын меңгір аударып отыр. Бұл – тігіннен тұрған алып тас әйел адамдар жерленген зираттарға орнатылатын, дейді олар. Қорымнан сондай-ақ, қола айна, былғарының қалдықтары табылды. Бұл қорған сақ дәуіріне тиесілі болуы мүмкін, дейді археологтар.
Дәурен Жүсіпов, тарихи-өлкетану мұражайының бөлім меңгерушісі:
– Біздің дәуірімізге дейінгі жетінші-бесінші ғасырларға жатқызып отырмыз. Бұл ерте сақ дәуірі. Адам сүйегі анатомиялық тұрғыда түгел сақталған. Демек, көміртекті талдаудың көмегімен көптеген мәліметтерді анықтауға мүмкіндік бар деген сөз.
Түлкібай Төлеуов, Облыстық тарихи-мәдени мұраны сақтау орталығының басшысы:
– Сақ дәуірінің қорғаны мен Түркі дәуірінің қорғаны қатар жатқаны бұл ұрпақ сабақтастығы дейді ғой, біріне-бірі жалғасып келе жатқан қазақтың тарихы. Соны дәлелдеп отырған нәрсе. Бірақ ол бірінші далалық визуалды тұжырымдар. Қалғанын толық зерттеп, басқа қорғандармен салыстырған соң нақты тұжырымы шығады.
