Президент Түркі мемлекеттері ұйымының бейресми саммитіне қатысты

Президент Қасым-Жомарт Тоқаев Будапеште Түркі мемлекеттері ұйымының бейресми саммитіне қатысты. Мемлекет басшысы «Шығыс пен Батыс тоғысқан тұс» атауымен ұйымдастырылған жиын алып құрлықтың ұлан-ғайыр аумағын иеленіп жатқан түркі елдерінің мүддесіне, стратегиялық мақсат-міндетіне сай келетінін айтты. Қазіргі күрделі геосаяси жағдайда Ұйым аясындағы ынтымақтастықтың мәні тіпті артты. Тиімді бағыттардың бірі – көлік саласындағы қарым-қатынас. Қасым-Жомарт Тоқаев Орта дәлізді Шығыс пен Батыстың арасындағы негізгі көпірге айналдыруды стратегиялық міндет ретінде атады. Осы орайда  бауырлас елдерді ірі инфрақұрылымдық жобаларды бірлесіп жүзеге асыруға, оның ішінде «Солтүстік - Оңтүстік» бағыты бойынша халықаралық көлік қатынасын дамытуға шақырды. Мемлекет басшысының айтуынша, цифрландыру және ақпараттық технологиялар саласындағы ынтымақтастықтың болашағы зор. Биыл еліміз Каспий теңізі арқылы оптикалық-талшықты кабель тарту жобасын жүзеге асыра бастады. Соның нәтижесінде аймақтағы цифрлық байланыс нығая түседі. Мемлекет басшылары саммит қорытындысы бойынша төрт құжат, соның  ішінде ұйымның Будапешт декларациясын қабылдады.

Веб-редактор: Нұрбек Балгүл Қайрошқызы