Қазақстанның өңдеуші өнеркәсібіндегі жаңа серпіліс

10.09.2025 07:17

Қазақстанның өңдеуші өнеркәсібі дамудың даңғыл жолына түсті. Саладағы жаңа серпіліс отандық және халықаралық нарықтарда бәсекеге қабілетті терең өңделген өнім шығаруға бағытталуы тиіс. Қасым-Жомарт Тоқаев Қазақстан халқына жолдауында соңғы бес жылда саладағы жалпы қосылған құн екі есе артып, шамамен 17 трлн теңгеге жеткенін атап өтті. Мемлекет басшысының айтуынша, бұл сектор Қазақстан экономикасы өсімінің негізгі қозғаушы күшіне айналып келеді. Тек былтыр ғана ел аумағында 160 астам жаңа өндіріс ошағы іске қосылды. Олар 12 мың жаңа жұмыс орнын қамтамасыз етті. Президент бұнымен тоқталмай, көрсеткіштерді еселеу қамында экономиканы әртараптандыруды жеделдету маңызды екенін ерекше атап өтті. Ол үшін озық үлгідегі жоғары технологиялық кәсіпорындар құру және елдің экспорттық әлеуетін нығайту қажет.

Нұртуған Оралбаев, «Экономикалық зерттеулер институты» АҚ тұрақты даму мақсаттары жөніндегі хатшылық директорының орынбасары:

- Өнеркәсіптік блокқа келетін болсақ - Мемлекет басшысы атап өткендей, экономикадағы өңдеуші өнеркәсіптің үлесі 12,4%, ал тау-кен металлургиясы - 8% құрайды. Бұл салалар инвесторлар үшін тартымды. Олар ел экономикасының қозғаушы күшіне айналып келеді. Сондықтан елде бірқатар орта және жоғары қайта бөлу өнімдерін шығаратын, оның ішінде көмірсутек шикізатын қайта өңдеу саласындағы жобаларды іске қосу өте өзекті деп санаймын.

Веб-редактор: Айнұр Досан