Қазақстандық ғалымдар бидайдың жаңа сұрпын шығарды. «Шөл» деп аталған бұл тұқым Ұлттық Аграрлық Ғылыми-Білім беру орталығы мамандары еңбегінің жемісі. Дақылдың бұл түрі гибридті сұрыптардың ішінен жекелей таңдаудың нәтижесінде алынды. Жаңа бидай сұрпы көп өнім береді әрі тез өсіп-жетіледі. Бастысы, аяз, аптап ыстық, қуаңшылық пен ауруларға да қарсы тұра алады. 1 гектардан 40 центнерге жуық өнім береді.
«Шөл» сұрпы барлық зерттеу-тәжірибелерден сәтті өтіп, патентке ие болды. Қазірдің өзінде еліміздің оңтүстігіндегі шаруалар жаңа сұрыпты егіп бастады. Ғалымдар күзгі бидай бүкіл ел аумағында жақсы өседі деп болжап отыр. Тіпті, ауа-райының қолайсыздығы да кедергі келтірмейтініне сенімді.
Бүгінде шетелдік аграрийлер отандық ғалымдардың жаңалығына қызығушылық танытып отыр.
Анарбай Ортаев, Сарқырама ауылшаруашылық тәжірибелік станциясының басқарма төрағасы:
– «Шөл» атты жаңа бидай сұрпын 2014 жылы алдық. 3 жылдық зерттеу жұмыстарының нәтижесінде 2017 жылы бұл тұқым еліміздің үш өңірінде егіле бастады. Алматы, Жамбыл, Түркістан және Қызылорда облыстарында жаңа үлгілер алынды.
Арнұр Шакерханов, Ұлттық аграрлық ғылыми-білім беру орталығы баспасөз қызметінің басшысы:
– Бұл сұрып ботаникалық тұрғыдан бай әрі әралуан. Гостианум гибридті түріне жатады. Бұл сұрыпты жақсылап өсіру үшін тұрақты суарып, тыңайтқыштармен байытқан жөн. Аязға қарсы тұра алады. Сонымен қатар, өсіп-жетілу кезінде шашылмай, тез ұнтақталады.
1. Жасанды интеллектті қолданасыз ба?
Сондай-ақ
