Қазақстанда жаңа пошта маркалары айналымға енді

Қазақстанда Бала құқықтары туралы БҰҰ конвенциясын ратификациялаудың 30 жылдығына арналған 4 жаңа пошта маркасы айналымға енгізілді. Мөр басу рәсімі еліміздің Сыртқы істер министрлігінің ғимаратында өтті. Маркалардың дизайны балаға деген қамқорлық пен отбасылық бірлікті білдіреді. 

Талғат Ғазизов, «Қазпочта» АҚ басқарушы директоры:

- Номиналы 450 теңгелік маркалардың 6000 данасы айналымға шықты. Олардың барлығы қазақстандық поштаның бөлімшелеріне таратылады. Көбі білетіндей марка - елімізде болып жатқан мерекелік күндер мен түрлі оқиғаларға орай шығарылатын символикалық мәні бар мемлекеттік құжат.

Айта кетейік, бұл оқиға Қазақстанның балалардың құқықтары мен мүдделерін қорғау мен әл-ауқатын қамтамасыз ету жолындағы жұмысын айшықтайды. Әр өңірінде балалар өкілдіктері институты құрылды. Бала құқықтары жөніндегі уәкіл институты және Балалардың әл-ауқат индексі енгізілді. Сонымен қатар, ел Үкіметі мен ЮНИСЕФ ынтымақтастығының жаңа бесжылдық бағдарламасы әзірленуде.

Рашед Мустафа Сарвар, ЮНИСЕФ-тің Қазақстандағы өкілі:

- Бағдарлама аясында балаларға қатысты жаңа сын-қатерлерді талқылап жатырмыз. Мәселен бұл құжатта климаттың өзгеруі, кибер кеңістікте балаларды қорғау, сандық білім, инклюзивті білім, денсаулық, сондай-ақ бүгінгі таңда өзекті болып отырған түрлі сын-қатерлерден балаларды арашалап қалу мәселелері барынша қамтылған. Бұның бәрі білімді, дені сау ел келешегін тәрбиелеу қамы. 

Авторы: Жеңіс Ермұқанов

Веб-редактор: Нұрбек Балгүл Қайрошқызы